Ongwediva- munasipundi gondango zovagendesi wopampo Immanuel /Gaseb, katente asi ngavamudiworoka Presidente gwawo Hage Geingob asi mugwanekedesi ntani muNamibia ogu gahara mbil, ogu gatulire mukaro gwendi neparu lyendi asi gahepa kukondjera vaNamibia navenye vagwane eparu lyewa.
‘’ Morwa mukaro nye gwangesi, ose kuna kugava mbudi zetu zoruguwo komugolikadi gwendi Monica Geingos, vanekoro ntani vaNamibia navenye gomuhoko,’’ yimo ana kutanta /Gaseb. Age katente asi Geingob kwakere gumwe ogu galituliremo asi nompitisili dopampo gahepa kugwana ko magano kwawo, ntani megendeso nye lyevhu lyompongasano mwaza sirongo nango nangoso. Age simpe ngagava magano asi ngani vampitisili wopampo omu navagendesa nomberewa dawo ntani vahepa kukwama ediveta lyosirongo. Age kwatulire siruwo sendi mokuhuyungisa ndango zonompitisili asi vahepa kuruganena kumwe,’’ yimo ana kutanta. Age kagwedereko asi mosiruwo nye sendi, awo vakere umbangi omu ngangusapo nomutangu edi ngadi kara mondango zonompitisili dopampo age nga kara poyilika yokudana maudano gompo, ntani etungiko lyonompitisili nayimwe ngoso.
‘’ Age yousili mukondjeli goyirongo yaAfrika yimanguruke, elihameseromo lyendi kuna kumoneka nawa nawa, ntani nombunga domouzuni dayidiva eyi. Age mudivi goyininke yokukareramo vantu ntani kurugana unene ntani age kwahere unene asi vaNamibia vahepa kumanguruka vatunde mokoloni,’’ yimo ana kutanta ngoso /Gaseb.
Pwantani ose kuna kudjobwana nombili noumanguruki morwa kulihamseramo mwene mokutjanga ediveta lyosirongo omu gakere asi yige mugendesi.
Age ngatu mudiworoka asi presidente govantu. Apa nye gagusire mberewa zonene mosirongo, age kwakere nerwameno asi kwato ogu navasiga konyima nokutulisapo Harambee zina kutanta asi kwato ogu navasigako vaNamibia navenye vahepa kuza ruha rumwe tupu,’’ yimo ana kutanta Gaseb. Geingob kadogorokere momazuva 4 Murongankuru 2024, mosipangero somoVenduka.
– fhamalwa@nepc.com.na