Oshikefa shokufutila ovanafikola ofikola veli koipupudilo yopombada osha yandja eekompiuta 10500 kovanafikola wa dja koipupudilo ya yooloka moshilongo Etivali moWindhoek.
Eekompiuta oda pewa ovanafikola opo va kale tava longo oinyangadalwa yavo yofikola noupu. Okwa didilikwa ovanafikola veli koipupudilo yopombada va kala veli momhumbwe yeekompiuta ngeenge tava longo oinyangadalwa yofikola, onghee naashi osha eta opo NSFAF a kale a yambidida ovanafikola.
Ovanafikola ina va pewa eekompiuta oshali ndele otava kafuta etata loshimaliwa eshi landifwa eekompita, omo omunafikola keshe ta ka futa oshimaliwa N$3000.
Ovanafikola ova pewa noushina vokuyandja omakwatafano ngeenge tava i komapandja opaungomba ngaashi okuya komalungula ngeenge tava ningi omapekapo moilongwa yavo ile tave li hongo okudilila komalungula.
Moshipopiwa shaye minista wehongo lopombada moNamibia Dr Itah Kandjii-Murangi okwa popya ta ti oministeli otai lalakanene okuyandja omakwafo kovanafikola aveshe veli momhumbwe yoikwafifo yofikola ile oshimaliwa shofikola. Okwa ti keshe omunafikola eli modula yotete a pumbwa okompiuta ota kala a pewa koshikefa shoNSFAF opo ovanafikola va kale vaxwaxwamekwa okulihonga nondjungu.
Murangi okwa ti paife ovanafikola otava kala tave lihongo noupu okuptilila komalungula shaashi ova pewa oikwafifo ei kwa li va pumbwa.
Okwa ta ti ovanafikola aveshe veli momhumbwe yeekompiuta na va kale va ninga omaindilo manga omafiku 28 Okoba ina fika.
Murangi okwa ti ovanafikola na va talele po eembelewa doNSFAF ile va kale va ya kepandja lokomalungula loNSFAF opo va ninge omaindilo. Okwa ti ngeenge omunafikola okwa mane okufuta oshimaliwa shoN$3000 okompiuta otai ningi po yaye mwene.
“Ngeenge omunafikola kena sha okompiuta eshi oha shi kala eshongo linene kovanafikola ngeenge tave lihongo,” Murangi ta ti. Okwa twa ovanafikola omukumo opo veli honge nelitulemo va ka ninge ovanashilonga vokomongula.
Paife ngaha NSFAF okwa longifa oshimaliwa shi fike N$59 eemilliyona okulanda eekompiuta dovanafikola.
Ivon Shadjuka okuli modula onhi-vali teli hongele ounamiti koshipupudilo shaUNAM shoHage Geingob okwa popya ta ti okwa kala ta longo oinyangadalwa yaye yofikola noudjuu eshi a kala eli momhumbwe yokompiuta.
Okwa ti pandula eshi a pewa okompiuta shaashi paife ota kala ta longo oinyangadalwa yaye yofikola noupu.