Opolifi moshitukulwa shaMusati otai konakona oshibofa shekwatonghonga omo vati okaana keedula omuwoi ka kwatwa onghonga kumumwainamati weedula 19.

Oshingingwanima eshi osha ningilwa momukunda Oshikuyu mOmusati oshivike sha dja ko meumbo lavo.

Omufekelwa okwa kwatwa po konima eshi nakuninga oshihakanwa a lopotela ovadali vaye.

Komufala wopolifi moshitukulwa shaMusati Commissioner Ismael Basson okwa hokolola ta ti omufekelwa okwa fitikinina okaana monduda noku ka kwatwa onghonga.

Vati oshibofa eshi osha lopotwa pa pita efimbo neenghono shaashi vati nakuninga oshihakanwa okwa ka lombwela ovakulunhu vaye papita omafiku.

Opolifi oya hokolola tai ti oya taalela eshongo linene loibofa tai lopotwa kwa laata onghee eshi ohashi kala shidjuu opo polifi i kale ya ninga omakonakono elixwapo.

Opolifi onghee ngaa tai kumaida ovadali opo vaha fiye vali ounona voukadona momaumbo novalumenhu ile ngeenge tava di mo nava kale tava fiye meumbo omukainhu ou ta dulu okutonatela ounona.

fhamalwa@nepc.com.