Okaana keedula 12 oka ninga oshihakanwa mongonga yopaixulo eshi ka kwatwa onghonga oikando ya yooloka komukulupe womido 60 nokokamayona kambulavo komido 14 meni moulefimbo weemwedi mbali.
Omunyonena ou owa tameka muSepetemba omudo wadja ko eshi vati keli kooxo, ndele tau ka tameka vali muDesemba eshi ka tembukila kooina.
MOshikando shaxuuninwa va ti okaana pamwe noumwaina kadona vavali - kamwe oke na omido heyali naka kwao hamano - ova ninga oule fimbo tava hepekwa paixulo kokamatyona komido 14. Okamati oko va ti oka dalwa ku xekulu mumwaina waina younona. Ina younona okwa hokolola ta ti okaana kaye oko komido 12 okwa li taka tekulwa kofamili yaxe komukunda Okeeke moshitukulwa shaMusati pefimbo ka ninga oshihakanwa lwotete. Ta ti manga nee keli kooxe okwa kwatwa onghonga komukulupe wopoushinda shavo.
“Konima eshi nda lopotelwa kutya okaana oka kwatwa onghonga onda ninga onghendabala opo ndi ka twale kovaxungimwenyo nokonima onde ka tembula ko kooxe,” ta ti.
“Oshikando shotete (kOkeeke), okwa li nda tumwa omongwa poushiinda kumekulu ashike manga ndi li mondjila onda nukilwa komulupe noku denga nge pedu ndele ta kwata nge onghonga,” okana taka ti.
Omukulupe ta fekelwa mekwatonghonga eli oku li modolongo nomokonakoko oshibofa shaye onghee ngaa taa twikile.
Ina okwa hokolola ta ti eshi okaana ka tembukila keumbo lavo kOkashana kiIngo moshitukulwa shaShikoto, opapita ashike eemwedi mbali, ko natango oka tameke okukwatwa onghonga kokamatyona kambulavo Va ti ngeenge ovakulunhu vaye keendingosho, kamatyona oo oha tameke oku ningila ounona omalitifo kutya oteva denge, nomafimbo amwe oheva heka kutya oteva landele ouleke noukuki.
“Ounona ova lopotela nge eshi va loloka oku iwa navo moixulo. Okudja opo onda denga okamatyona noku popya nako kutya ina ke shi ninga vali,” ta ti.
Okwa ti mumwainamati okwe mu lombwela opo a ka lopotela opolifi.
“Ka kwali nda hala oku lopota kopolifi shaashi oshinima eshi otashi dulu okueta outondwe netopoko mofamili,” ta ti.
Ashike kamatyona oo va ti okwa ka denga vakwao shaashi ve mu lopota.
“Ngeenge handi di kofikola ihandi kala vali nda manguluka. Ohandi kala nda tila efimbo keshe,” okaana taka hokolola.
Taka ti ihaka kala vali ke li tula mo meetundi kofikola, ko ihaka kofa vali nawa, oha ka kala alushe taka hepekwa komadilaadilo molwa ominyonena odo ka longelwa. Minista woukashike kookanhu nonghalo nawa yokaana Doreen Sioka okwa ti omulumenhu keshe ta ka hangika e li mekwatafano lopaihole nounona va shona ile a kwata okaana onghonga na kale a kwatwa po diva. – fhamalwa@nepc.com.na