Omalelo goondoolopa, Okahao nOngwediva oya tsikile oya shaina natango omikanda opo ga tsikile oku longela kumwe.
Oondoolopa ndhika dhokonooli odhali dha shayina tango uukumwe mo2008, nodha ulike ohokwe yoku tsikila natango.
Uukumwe mboka wa kala ethimbo ele lela, owa shayinwa okukaleka po elongelo kumwe ombili oshowo okukandula po omaupyakadhi taga taalele omalelo ngoka gaali.
Mayola gwondoolopa yaKahao Cornelia Iiyambula okwa ti, sho ya shayinuna etso kumwe pokati komalelo gaali, oya shayinununa etsikilo lyelongelo kumwe lyapama onga aamwayinathana.
“Elalakano olyoku longela kumwe, okulongathana, okupukululathana, okukumagidhathana oshowo okupameka ohole pokati koomalelo getu gaali,” ta popi ngaaka.
Ta ti, ashihe shoka otaye shiningile okulongela aakalimo yawo omauwanwa oshowo okuya etela omayakulo ya pumbwa.”
“Momalelo goondoolopa getu agehe otwa taalela omaupyakandhi ogendji omolwa egwo pevi lyoshimaliwa, onkene otwa hala okulonga twi itula mo pamwe, opo tu vule okugwanitha po omayakulo agehe gomalelo goondoolopa ngaka,” ta fatulula ngaaka.
Ta ti, ekwatathano ndyoka pokati komalelo ngoka ota li ka kwathela okukandula po omaupyakadhi taga shunitha monima oondoolopa ooshowo omayakulo galwe. Mayola gwondoolopa yaNgwediva Taarah Shalyefu okwa popi esiku ndyoka kutya, etsokumwe lyuukuume ndika ota li kala lyafa ohauto tayi kandulapo omikundu pokati koondoolopa dhoka mbali.
“Ota tu tsikile okulongathana okupukululathana okupitila mekwatathano ewanawa lyi li pokati kawo, ngaashi naana sha tothwa mo meshayino,”ta popi ngaaka.
Ta gwedha po kutya elalakano lyawo limwe ashike, okulongela uwanawa aakalimo yawo oshowo okuya gwanithila po omauveko ya ningilwa.
Shalyefu ta ti, oya nyanyukwa no ya ilongekidha okutsikala uukuume wawo nelelo lyondoolopa lyaKahao.
Omalelo ngoka gaali oga kwashilipaleke kutya otaga tsikile okulonga nuudhiginine opo ga ete elunduluko, ehumokomeho oshowo okuyambula po eliko lyoshimaliwa moondoolopa dhawo.