Minista gomindhingoloko omatalelepo nomaluhwa Pohamba Shifeta okwali a ningi oshigongi okuuvitha ko aanangeshefa kombinga yokatendo okape ke na sha nomashina ngoka haga tewa niimaliwa momahala gokwiinyanyudha.
Aanangeshefa yomashina ya za kiitopolwa yilwe monooli okwa li ya gongala Etine mOshakati okupulakena oshowo okugandja omayuuvo gawo kombinga yoveta yina sha nomashina.
Shifeta okwa ti okatendo hoka okape Gaming and Entertainment Control Act, 2018 (Act No. 13 of 2018 ) oka li kayi miilonga okuza 01 lyaDecemba omvo gwayi.
“Okatendo haka otaka kwathela ooyene yomashina okulonga nuupu noke na uuwanawa owindji,” ta fatulula ngaaka.
Ta ti, okwa li a kondjele oyene yomashina opo puye okatendo hoka take ya kalele po oshowo okuyagamena.
“Oyendji okwa li ye li ompinge nomashina opo ga hule po thiluthilu, oshoka otaga eta uupyakandhi moshigwana. Aantu yamwe oya kwatwa ko komashina unene,” ta popi ngaaka.
Tagwe po kutya shoka osho shili, aantu yamwe ohaya tula iiyemo yawo ayihe momashina.
“Oyendji kayu uvite ko elalakano lyokudhana omashina. Eshina oli na okudhanwa ashike ngeno okwi ikutha uuza, ihe haku tula mo iimaliwa ayihe,” ta popi ngaaka.
Pohamba okwa li wo a fatulula kutya okatendo haka taka longithwa paife otaka indile kehe gumwe a kale iinyolitha opo ku shiwike kutya omuna omashina gangapi moshilongo ga pewe oonomola.
“Omwa pewa ashike oomwedhi hamano opo kehe mwene gweshina a kale iishangitha, hoka kwali kwatameke mu Desemba omvo gwayi,” ta popi ngaaka.
Tagwedhapo kutya omashina agehe otaga ka tulwa uushina mboka tau kala tau kondotola eshina momikalo dha yooloka.
“Uushina mboka otawu ka kwathela okumona omashina uuna ga yakwapo, “ ta fatulula ngaaka. Omupevi presidente gwongundu opo ya totwapo Naloba Peter Kanu Amadhila okwati aanangeshefa oyendji otaya nyenyeta kombinga yiifuto yomikanda dhomashina.
“Omashina ohaga futilwa N$25 000, iimaliwa mbyoka oyindji koonkondo shoka tashi tuundulile moondjo,” ta nyenyeta ngaaka.
Ta pula kutya oshiivule peni okukuthwa eshina naashoka taya na nanenwa moondjo.
Ta ti, aanangeshefa oya ti ngele epangelo olyi wete kutya aanangeshefa yomashina ohaya ningi oshimaliwa oshindji, epangelo na li landeko omashina ngoka lyo ta li kala ta li ga kondolola omanga ge li momahala gawo.