Jazema Hangero
Omuṱuta wongombo ombinḓe Vaanavi Ripunda ngu kondjera mOkondjaṱu ma ku otjiwaṋa novaṱuta mouparanga wehi okurikwamba keyuva enene romahongero wovinamuinyo ovihomonena.
Omukuramenepo wotjitjitwa hi oure wozombura ndatu nḓu maze ya oministera onguru Philemon Malima. Omahongero nga maye kara mOkondjaṱu omayuva tji ye ri 6 Seninaṋi ndi ri Oritjatano pOkonganda Plot okuza mozoiri zomuhuka.
“Ounahepero weyuva ndi okutara kokutja ovinamuinyo vyetu ovihomonena vya zengira pi nu matu vi kotora vi mokati kotjiwaṋa tjetu. Matu katjiukisa ongombo ndji ombinḓe nongombe ndji Onguni kovature va Namibia,” Ripunda ma tja nao. Otjitjitwa hi matji sembamisiwa i yOsaive Stud Farming, mbu ri ouṱuta mbu hongorerwa po i yongombo ombinḓe (Apple Goat). Oruveze ndwi ru ri 2 km okupita mOkondjaṱu.
Orata Onene yOmbazu ya Kondjaṱu, Jefta Kuhanga, wouhonapare wombazu wa Kambazembi opu ma kara, nu Mberijameka Hengari ngu ma ka kuramena po Omurari FM ngunda Kaatere Tjiharuka wEkori rOmaṋi ama tara kounahepero wokutumba omuhoko wongombo ndji ombinḓe.
“Ovakurundu vetu maave ku tu honga ounahepero womikova vyovinamuinyo mbi kutja aave ungurisa ku tjike. Mokati kovatengwa varwe mamu kara Mbiuu Kauta wongombe ndji Onguni,” Vaanavi ma tja nao.
Oritjatano maku kara ovitjitwa ovingi pekepeke mokati kavyo mu mu na omahongero womukova kutja u ṱukwa vi, u nounahepero watjike. omarisiro wovakurundu nokuvekonda ozonyara,
Tjomundu Ramana wonganda ndji Oli’Feas nomuhongwa pOuniversiti ya Namibia ma katara komiti vyomokuti mbya konḓononwa mbi mavi yenene okuungurisiwa kokupanga ovinamuinyo pendje aruhe okuundja komiti omipange m b i r a n d w a m o z o k e s i . “Matu kakara nomahongero wovirasewa vyozonyanda kutja moruveze rworive ze sokurya ovikeekurya, ngu matu kahongwa i Frank Kanguatjivi wonganda yovirasewa indji Ofeed Master.”
Omahongero warwe maye katara koruveze ozonyanda mu za sokurondwa kokutja ze kwate moruveze ndu ku novikurya ovingi. Ongurova ovandu ave katetisa onyama yopomakara.
Oroviungura maku tarewa konyama yOnguni nonḓu ndji Ondamara kutja tjii hapo ouatjiri tji ku za ovinamuinyo mbi kavi nonyama poo indee. Ovaṱuta otji mave kerimwina oveni otjiṋa hi. Ngurova maku kakara omayatero wozombaze pu mape kataarwa ondana ondema Onguni nozongombo ozombinḓe. Otjitjitwa matji kapata nomaraisiro womazarero wombanda yomukova wOnguni.