Oshikumungu shevakulo ledu la ningwa mOmaruru mexulilo shivike vati ola xwaxwamekwa kopolotika.
Enyekulo eli vati ola ola ningwa keefamili dafika po50 odo dali hadi di mosingela, ndele tadi tembukile kolukanda laWelwichia mOmaruru.
Onghatu ei ya kufwa kovakwashiwana ava vati oya didilikwa yaxwaxwamekwa kopolotika oshoyo kedundakano - Omukulunhuwiliki womunicipality waMaruru Valentinus Sindongo.
Ovakalimo ava vati ova kala veli mongudu yaava vehe na onhele moshitopolwa, noshakala shapumba kuvo okumona onhele yokutunga.
Omunashipundi wongudu yoNambee Domingo okwa lombwela New Era kutya, nonande voo veli eedalele daMaruru, va tekulwa mo nokukulila mo, vati ova kala momaumbo ovadali vavo eedula dafika po40.
Edu vati ohali pewa ashike ava hava longo, oshoyo ovapambele vokokule.
“Fye otwa loloka oku teelela municipality a tameke okuninga eshi ta ningi po. Paife otwa hala va tameke oku pwiikina kushe. Fye itatu nyeke edu, ndele ohatu kufa ashike edu letu,” ta tumbula.
CEO wodoolopa Valentino Sindongo okwa tumbula kutya, manga ovakalimo vaMaruru inave li pa eenghono dokutembuka nokukufa edu lavo keenghono, vati okwa li atya onghalo yavo ote itula moilonga opo vadule okupewa evatelo.
“Eshi vati ndaka papala ovakwashiwana otava pula nale komesho. Oinima imwe oya xwaxwamekwa kopolotika shaashi kombinga yelelo lokansela oinima yetu oya yukilila ashike,” Sindongo ta ti.
Okwa twikila kutya okuna okuninga oshoongalele shonomenawina meendelelo, shaashi ovanhu vamwe ava vaka hakana eenhele ove na nale omaumbo.
Okwa twikila yoo kutya opolitika oya xwaxwameka oshiima shapuka shaashi vati ope na aanhu vamwe nghee va dja mo2015 tava kongo eenhele domalukalwa ndele fiyo onena inava nyamukulwa.
Oshiningwanima sholudi eli natango osha ningwa oshivike shadja ko moWalvis Bay omo ovakalimo vali tava kongo eenhele domalukwalala shaashi ova loloka okudja novadali vavo.