Nonando oshigwana sha kala nokukumagidhwa nkene shi na okuningwa opo kaashi ekelehi nenge shi dhipage oohanona, oshikumungu shaanona taya ekelwahi nehoyo mo lyomategelelelo onkene tashi tsikile.
Oshigwana osha kala nokulondodhwa shi kale tashi fala oohanona kiipangelo, kiitaasi yopolisi oshowo komagumbo gaapambele, olundji kaape na omapulapulo gasha. Shika osha kala tashi taambathanwa komalungula oshowo miikundaneki ya yooloka. Oonomola oko dhi li komalungula, okumona mboka taya indile noye na ohokwe okuhupitha oomwenyo dhaanona mboka.
Okuza omimvo dha piti, aantu yontumba oya kala noku ekelahi oohanona, oshowo oku ikutha omategelelo shoka hashi ya tula muupyakadhi.
Opolisi nayo oya kala nokugandja omalongo unene kaanona yosikola nkene ye na okuninga uuna ya iyadha muupyakadhi wu li ngaaka, okukeelela omadhipago goohanona oshowo omaso gawo yene.
Omaandaha goshiwike shika, olutu lwohanona opo ya valwa olwa itsuwa kuunona wosikola metoto lyiiyagaya, sho wa li tau ende po.
Sha ikolelela komugandji gomauyelele mospolisi yaShikoto, Inspeketa Ellen Nehale, oshiningwanima shoka osha holoka momukunda Iiningo moshikandjohogololo Oniipa. Otaku hokololwa kutya olutu lwokanona hoka okwa li talu ulike lwa adha okuvalwa, nokwa li lwa adhika mondoloma yiiyagaya.
Olutu ndoka okwa li lwa falwa koshipangelo kOnandjokwe. Opolisi otayi indile oshigwana shi longele kumwe nayo okukwata omukiintu a longo iilonga yi li ngaaka.
Oya indile wo natango aakuluntu momagumbo ya kondolole ngele ope na ngoka a li megumbo e na etegelelo ihe ke lyi na we, ye kee na ohanona.
Omakonakono gopolisi otaga tsikile.
Oradio iiwike iyali okwa li ya popi kutya olundji oohanona ohadhi ekelwahi kaanyasha mboka yu uvite kutya inaya thika methimbo lyokukala oomeme.
Gumwe okwa li a popi kOradio ta ti, aakuluntu momagumbo nayo naya gandje omalongo kaanona yaakadhona nkene ye na okuninga uuna ya adhika kuupyakadhi mbuka. “Shoka ku na mpoka to shi piti, opo ku yandwe uupyakadhi womaso gombaadhilila nenge goondholongo, omukuluntu na popye nomona shoka shi li mondjila,” ta ti ngaaka.
Ta ti, shoka itashi xwaxwameke aanona ye shi ninge, ihe na popye uuwinayi oshowo uuwanawa womategelelo. vkaapanda@nepc.com.na