South Africa okwa patulula ishewe omangeshefelo giimuna niikwanyama okuza moNamibia sha landula sho omangeshefelo ngoka ga li ga ningi ethimbo ga patwa omolwomukithi gwekondo nelaka ngoka gwa li moNamibia.
Omangambeko gamwe natango opo ge li, oshoka okwa ndhindhilikwa kutya omukithi ngoka ogwa lota, ashike inagu hula po thiluthilu.
Ndhoka okwa Ii dha popiwa kundohotola gwiimuna muuministeli wuunamapya, omeya niikwamavi ndohotola Albertina Shilongo.
Oompango ndhoka okwa li dha tulwa po okundolola omukithi ngoka kwa li tagu endelele moSouth Africa, no kwa li ku na uumbanda gu ponokele moNamibia.
Omukithi gwekondo nelaka okwa li gwa ponokele South Africa mo2019, shoka kwa li sha etitha Namibia e ye po noompango ndhoka.
Sha ikolelela komushangwa gwapitithwa kuuministeli wuunamapya, omeya niikwamavi, Shilongo ota ti, oompango ndhoka dha thigwa po, okukondolola iihauto ya humbata iinamwenyo okuza moNamibia okuya koSouth Africa nadhi simanekwe nokulandulwa.
“Uuna iimuna tayi londekwa yi falwe koSouth Africa, aahingi naya kale aluhe taya ulike komunambelewa oombapila tadhi kwashilipaleke kutya osheenditho shoka osha opalekwa nosha tsininwa,’’ ta ti ngaaka.
Ta gwedha po kutya iiyenditho oyi na okukala tayi tsininwa noku opalekwa aluhe, okuya nokugaluka.
Shilongo ta ti, iihauto ayihe nayi kale tayi ndhindhilikwa uuna ya tsininwa nokupewa ombapila tayi kwashilipaleke kutya oya opalekwa, okukondolola omukithi ngoka kaagu indjipale.
“Kehe osheenditho itaashi ka kala shi na oombapila tadhi ulike ashihe shoka nda zi nokutumbula itashi ka pitikwa okupita,” ta fatulula ngaaka.
Ta ti, omuhingi ta ka ndopa oku ulika oombapila ndhoka, ohauto ye otayi ka kuthwa epitikilo lyokufala iimuna okuza moNamibia okuya koSouth Africa.
“Iiyenditho ya humbata iikulya yiimuna natango tayi zi koSouth Africa, otayi kumagidhwa yi kale ya tsininwa nokuulika oombapila dhokukwashilipaleka poongamba, kutya omilandu noompango adhihe odha gwanithwa po,’’ ta kumagidha ngaaka.
Caption: Iimuna oya pitikwa okuya moSouth Africa ngashiingeyi konimaya li ya indikwa omolwomukithi gwekondo nelaka. – vkaapanda@nepc.com.na