Omauhonapare wombazu wa Hoveka, wOvaherero nowa Maharero otja tji yenanenwa pamwe mOkarukondwa kOmatoororero ka Tjombinḓe i tjiva nge norupe nu ngeri kongotwe yomanakauriro womazeva wohandurisiro i yOtjirata tja Maheke.
Kombunda ombongarero yomatyasaneno yOkarukondwa nga mu Tengarindi ndja ri pomuvero wa Kaṱumba mokarukondwa nga okutara momazeva nomirari vyomahandurisiro mbi.
Orata Wenzel Kavaka pu yari. Okuza nokutara muvyo ai munu kutja mu nozohaviho ozonene tjinene. Tjinene kokuiisira kokutja mavi yepasana nokupingasana noviṋenge pekepeke vyOngunḓeveta ya Namibia, ozongutiro zOmbongarero Oitjavari yEhi yo 2018.
Tjinene otja tji mavi tjama na imba mba yekwa nokupandjara ehi oro ndaari ondimwa yotjirwa tjongutukiro.
Okuza pombongarero ya Kaṱumba opu pa tjangerwa orutuu kehi yena ra Mohammed Kamburona otjomukawondjise wombongarero ya Kaṱumba. Nduri orutuu ndwa vaza kOmuhaamise wOtjirata tja Maheke, Ignatious Kariseba na wina Otjiuru Otjikayendise tjOviungura vyOtjirata, Peka Semba. Kutja ndino ndi pe munike ayo ovaekwa novapandjare vehi mave yendayenda amave ya nḓimuka mozombonḓu zouvi nozondjo.
Mokutja ngunda averi mozomboṱu kehi yozoveta nomazeva pekepeke wohoromende ehi rotjizeero rawo kanaari kakotoka nu indi nai ndi va sewa naro mari iririre.
Kovandu varwe mbe he ri owo mbe riyekwa nokuripandjra nungwari kovandu varwe mena rokutja wina ovakwatera va Namibia mbe nousemba tjimuna ovakwatera avehe vokuhandurisiwa mu kangamwa oruveze pu pa munika omahandurisiro.
Ndu maru womborora otjiwaṋa motjiungura hi, nge he ri omawombororero wakandino ndi nungwari tjeri otjiungura orutuu rwehi rotjizeero tjiri kara natjo natji rwa ramanga ya rire mayuva, okuza mOmandaha otji ru notuwondja twozombongarero.
Okuutira mOkakarara Omandaha tji ye ri 15 komueze mbwi okuza mohinga yomurongo womuhuka ngandu mohinga yondatu. Oritjavari tji ye ri 16 ku Kozonjanga arire mOkatjoruu okuza mohinga yomurongo womuhuka ngandu moimwe. Oritjavari wina tji ye ri 16 ku Kozonjanga yarwe ai kara mOkamatapati okuza mombari yomapeta ngandu mondano.
Oritjatatu tji ye ri 17 ku Kozonjanga okuza mohinga yomuvyu womuhuka omunene ngandu mohinga yondatu yomapeta omo Kondjaṱu nOroviungura tji ye ri 20 ku Kozonjanga arire Okandjira ka Vitoto.