Kae Maṱunḓu-Tjiparuro
Onongo motjitamba tjoporotika nawina omutjange kuye omuini ngwa katuwa pehi, Vitura Kavari ma tja Samuel Maharero rutenga otjiraisiro notjihorera tjomitima vya Afrika engaruvyo mu ri ha tuurunga okurwisa ohuurire; ondaarero yOvafrika mokutja Omuniovita wOvaherero mOtjirwa tjavo tjombiririro eye ke na indu wa kamburwa poo a ṱu i yomunavita nu kape na indu pa kara nonḓuvasaneno imwe poo yarwe yohange pokati kEhi rOvandoiji nOvaherero poo ovandu va Namibia, koruseinina wina tji tji he ri otjiṋa otjiṱikona kaparukaze otjiraisiro tjokupanḓera pOvaherero novandu va Namibia avehe okupaha kutja Otjiṱiro Otjindjandja tjavo i yEhi rOvandoitji tji ṱunwe.
Eye wa hungiririre kohepero nondengu yo zo mbura esere zo ma zemburukiro wondiro yOmbara Otjitambi yOvaherero, Samuel Maharero, omayuva wo ma suviro ngazuko ngwa zemburukirue mOkahandja.
“Ousupi munao omazemburukiro wozombura esere zomakotokero nomahorekero rukwao womaṱupa wa Katjikumbua Samuel Maharero mOkahandja otje ri otjitjitwa otjinamakuruhungi okuzemburuka Otjiṱiro Otjindjandja tji tja tjitwa i yovimbumba vyohuurire vyOvandoitji,” Kavari ma tja naweza kokutja otjitjitwa hi tji nomaheya omanene tjinene mongamburiro nombazu yOvaherero nOuherero.
Onongo Ellison Tjirera ma tja omakotokero womaṱupa ya ri okuhakaenisa ozombepo zovakuru novaṱi munao omayamberero wa Kahandja mu Katjose ombura aihe oyo nga kutwa ku nomakotokero womaṱupa wa Samuel Maharero otji ye ri otjiṋa tjapeke tjinene mongarero yoporotika nombazu yOvaherero. “Maye sokutuwaneka atuhe nokuririsa ozombangaṋe zetu okuzemburukwa otjozombangaṋe zotjiwaṋa atjihe nḓe he ri zouvara umwe,” onongo Benny Zaaruka wa tja. Naweza kutja Samuel Maharero wa ungurira Ovaherero avehe.
Okaṋepo okakuru kOswanu ya Namibia mombongarero yOtjiwaṋa, Usutuaije Maamberua, ngunda ama itavere kokutja mo 1923 ya ri otjitjitwa otjiwanise, eye kenongamburiro kutja nohaṋi ndji ri motjiwaṋa ku ndino ndi otjo matji rire otjitjitwa otjiwanise ma munu kutja atja tjingunda amatji turikwa, ngandu outupatupa nomauhonapare pekepeke wombazu tji ya ṋina omitongatima vyawo.
Ratunua Katupose ma tja ohepero omaṱiziro nomapwikiro vyovirumatwa vyombazu.
Nu tjinenenene eserowondo indi ra sokutjiukirwa komatutumunikiro mondjira komurungu yokupaha otjisuta.