Jazema Hangero

Otja konongo yeraka poUniversiti ya Namibia ousupi oUnama, Jekura Kavari, ombwena embo nda za ketjitambo ndi okupwena, motjiṱo hi matu hungire okupwena omanyuṋe. 

Ombwena oini otjinamuinyo omuarikaze ke pwena omanyuṋe kokutja ma tukure, nu ovikurya vyapeke. 

Ombwena i tjitirwa omupanguruke i yovemukwate nungwari kai sere okuyetwa i yovapandukise kaparukaze. Ombwena i ṱa poo i pwenisiwa eyuva omupanguruke tja zu nokupanguruka nu onyama ndji i riwa yovakazendu porwzvo kai riwa i yovarumendu tjazumba i ṱizirwa kongotwe yondjuwo kamomuvanda. Moukoto womanyuṋe nga mu tuwa okamuze komumbonde ku ke ungurisiwa otjomuti omupange omukohorore. Okukohorora ondova morutu rwomupanduke.

Ombata onene ndji ri po nai oyokutja otjikeenamuinyo tji tja sokupwenisa. Ovandu ve ungura oviṋa otja komakondwa mu va za. Ouzeu okukara neziriro ekahu orondu omundu auhe u tja ami mba zuva nao, mba muna nao. Ombwena i rira ongombo, onḓu poo ondana, popengi ondana i yandjwa komuatje tje ri omuingona.

Rukuru ombwena ai yandjwa i yomukupe poo ihe yomupanduke.  Omuatje omuzandu ngu hi ya kupa tja ṱumbaparisa kaa kahepura orondu ondjambu. Omuatje ngwi tja pandukwa a rire omuangu waina tje ri omukazona poo a rire omuṱena waina tje ri omuzandu. Omukazona ngu hi ya kupwa, ombwena rukuru aa pewa i ihe, moruveze rwanambano i yandjwa i ihe yokanatje ku kapandukwa, Kavari ma tja nao. 

“Ovitjitwa vyetu vyombazu tji tu hi nokuvikongorera popezu nokuviungura otja kororowa mavi pandjara onḓengu nomaheya. Ngatu kondje okuungura ovitjitwa vyombazu otja kekuru. Okuhina oveta yombazu itjimwe tjoviṋa mbi tunduuza ovandu okuriungura ovitjitwa vyombazu otja kozombango zavo oveni,” Uahaama Tjinjeka omuhongwa wOunama ma tja nao.