Jazema Hangero 

Otjiwaṋa mutjo mu muna omitanda novahongua tja karere nondjoroka natji raisa ounanḓengu womavyuriro womitanda. 

Destiny Kahungirue Kauta omuhongwa wOtheo Katjimune ma tja: “Tjiri ya ri omaronga omawa” nu wa toora po eronga rimwe nda tjere: ”Ondjira yomuinyo onde posi ya tji wa ramanga, no ha teka ombango mo vaza ku mo vanga okuyenda nu mo toṋa mu avihe mbi u zera.” 

Oserekaze Inge Veripi Murangi ngu panga ominyo wa tarere tjinene komiano omitanda mbi mavi yenene okuvaterwa kokutja vi rire omikwatera omisemba noviyandjahambwarakaṋa komekuriro wehi ne vi ningire 

okukambura omerizira wominyo vyavyo pendje nokuundja komundu warwe poo okuyandja ondjo komundu warwe mena romauzeu mu vi kerimuna. 

Wa yandjere omaronga wokuvatera omitanda okuhupa ominyo omiwa. “Arikana tji u he ri nawa, paha omundu ku mo serekarere ouzeu woye, tenga ovandu varwe nu hupa nondando ndji mai ku pe omasa wokuzera okupenduka eyuva arihe noondarire kutja ngunda oviṋa kavi ri nawa.” 

Omuyandje womihunga momuinyo, oserekaze Valencia Katjipuka wa raisa kutja, ngunda kape ya womba, omarundurukiro ye ya ku kangamwa omundu na weza kutja omundu ko sokurihahiza ngunda au nomuinyo. Nu maningire omitanda okupuratena komaronga wovanene vavyo tjinga ave zera ouwa nonḓoneno kombanda yominyo vyavyo. 

Oministera yOkehi yOuveruke nOnḓunino yOtjiwaṋa Onongo Ester Utjiua Muinjangue, ma rakiza omitanda nai: “Omuinyo kau memenwe okurira omupupu posi ya omundu u rihongera kozondataiziro ze. Omundu ko yenene okuzengurura omauzeu woye ayehe posi ya tji we riyaruka, o rikonḓonona mo ye tjiwa o kara nomuhunga nokuyepahera ondunge yokutja mo ye hungama vi.” 

Ovanene va sokutanaura omaronga ngu mave yandja kovanatje otja moviwondo vyavo, orondu omuinyo wa runduruka nambano rumwe ondunge ndjaai ungura rukuru kandji mai ungura kouzeu wovanatje vanambano.