Tji ye ri 6 komueze mbu mau yende, mbu ri Katjose, omuhonge omunene Peter Katikisa Daniël (PKD) Tjijombo otji ma suvisiwa mOtjiuaneno tja Tjinene.
Mbi ma karira ape oviveke vitatu kombunda yonḓiro ye mOtjomuise Osondaha nda zuko. Otjikutu tje tja tjirirwe amatji tjivisa nao kouye erero omuhukomune okutuurungira momurari imbwi Keetute wOndjivisiro Ombaranga. Amatji tjivisa kozombongo novahonge otjomundu ngwa tjiukwa otjombako yazo otja kozongamburiro pekepeke; ovanane vombazu na wina ovira vyoporotika muvyo mu mu notjira tje Oswapo ya Namibia, nu tjinene koviuru vyayo okuutira ku Sam Nujoma, Hifikepunye Pohamba nganduu ku itjo tji ri po nai Hage Geingoba.
Kakutja nai orupare rwa paturuka ku ngamwa auhe moviṱo mbi pekepeke okuhununa ko ozonyosa kondjou ondwezu ndji. Moviṱo avihe eye ma yata momuano umwe poo warwe nu muvyo wina ma isa ovihando mbi hina maavi zembwa poo ozondambo nḓe hina maaze zengi. Otjombangaṋe kutja omongamburiro, ombazu na motjirwa tjongutukiro. Okuza nganda ombuze yonḓiro ye aya handjaukire, otja tji ku za kutja oviungura vyomundu vi mu kongorera, omauye ya utire okuhununa ko ozonyosa pehuno re. Nge ri ovikasuka nomautiro uriri tjinga ngunda wina oviungura otja tji mavi sembama ama pe undjirwa kutja ovengi ngunda oku ve ri mave usuka okuyandja ondjozikiro ndja pwire.
Movengi mba yandjere ombinika yoruhoze kotjikutu Otjiuru tjEhi, Hage Geingoba. Eye ngwari ae he ri motjihuro. Ngwa tjere omuyaruke Tjijombo wa ri ondjandje aruhe ndjaai zara otjivepo tjoupupu. Ovyo mbi ri oviṋenge mbya sere okuyandja omasa korutanga roruyaveze “Omuhonge Omunene Tjijombo me mu zemburuka nawa tjinene. Momakotokero wandje okuza kouye wopendje twa tjiwasana outjiwasane mbwa karerere ngandu konḓiro ye,” Geingoba wa tja.
Omaturiro womuyaruke mOkatutura momurari imbwi OPKD Tjijombo okuza kombuze yonḓiro ye wa rire tjimuna Omecca, otjihuro otjiyapuke mehi ndi Osaudi Arabia vongamburiro yOvaislama ku ve keriyapurira; poo Omoria mOsouth Afrika Ovaziona ombura aihe omayuva wOkambo kOnḓiro kuve keriyapurira tjinga ovimbumba amavi worongana okuyandja ondjozikiro nokuhuhumiṋa otjikutu.