Opolifi moshitukulwa shaHangwena oya kwata po omukainhu womido 36 konima eshi vati a twa neonga nokudipaa omulumenhu waye.
Otaku hokololwa omukainhu oye tuu oo a ningila ina omatilifo oku mu twa neonga.
Oshiningwanima osha ningwa Etivali lwopotundi 23h00 momukunda Onaame.
Hambeleleni Shinana ina yomukainhu oo okwa ti omona okwa twa noku dipaa omulumenhu wedina Taapopi neonga pefimbo kwa li tava tanguna.
Shinana okwa hokolola ta ti okwa hangika a kofa nale novatekulu vaye pefimbo omufekelwa nomulumenhu waye va dja keendingosho.
Omukulupe ou weedula 68, ta ti okwa kendabala okuhanuna omona opo aha twe kaume kaye komoihole, ashike naye okwe mu ningila omatilifo ta ti ote mu tu neonga.
“Ama naame onda li nda tila okutuwa nehonga onghee okudja opo onda mwena,” ta ti.
“Onda uda ashike ovanhu tava tanguna konduda yokunangala. Onda uda omumwange (omufekelwa) ta lombwele omulumenhu ta ti kutya nandje mo monduda yaye shaashi ine mu hala vali,” ta ti.
Shinana okwa hokolola ta ti okudja opo ye noutekulu ova penduka nounona opo va ka tale kutya oshike tashi tanguninwa.
“Eshi nda ya monduda yavo onda hanga omufekelwa e na eonga.
Onda endelela opo ndi li nyeke ko ashike okwa lombwela nge kutya ota tunge ngaashi naana ta tu omulumenhu waye. Okwa dula nge eenghono ndele ta denge nge pedu,” Shinana ta hokolola. Omukulupe ta ti okwa tameka okukuwa ta ifana ovashiinda ashike ovashiinda ina va uda ko.
Onghee okwa lotokela meumbo lamushiinda shaye opo e ka va lombwela kombinga yoshikumungu eshi. “Keumbo lamushiinda onda dja ko nomulumenhu nomukainhu. Eshi twa fika meumbo otwa hanga omufekelwa a kokolela omulumenhu mepya ponhu, e li mekungo lohonde a tuwa neonga momunino,” ta hokolola. Ova lopotela opolifi ashike eshi opolifi ye ke ya, omukainhu okwa hangi ka a faduka po, a uka moixwa.
Shinana okwa ti nakuninga oshihakanwa okwa twalwa koshipangelo kEngela ashike okwa xulifila mondjila.“Okwa longa oshimbuluma she tu tilifa, nounona vaye ova tila. Paife kandi shi shi kutya oh andi ningi po shike eshi a dipaa omulumenhu wovanhu,” ta ti.
Omukonakoni woimbuluma wopolifi woshitukulwa shaHangwena omupedu Commissioner Zachariah Amakali okwa hokolola ta ti omufekelwa okwa kwatwa Etitatu efimbo longula eshi a hangika moixwa nokwa holoka momhangu yaHangwena onghela, omo a tindilwa elifule mo.
fhamalwa@nepc.com.na