Omukulupe womido 70 okwe limangeleka molwaashi vati a kanifa oimaliwa yaye, ya nanwa kokambo kaye kombaanga komutekulu. 

Oshiningwanima eshi osha ningilwa momukunda Olupandu moshitukulwa shaMusati. 

Nakufya okwa tongolwa oye Kondjeni Haufiku omukalimo womomukunda Olupandu. 

Omukonakoni woimbuluma wopolifi moshitukulwa shaMusati omupedu Commissioner Moses Simaho okwa hokolola ta ti Haufiku okwa ninga omafiku ta nyenyeta, molwoshimaliwa shaye osho sha nanwa ko komutekulu waye. 

Kape na ouyelele kutya oshimaliwa sha nanwa ko oshifike peni ashike vati okwa kala nokulombwela ovashiinda shaye kutya okwa udifwa nai koshimaliwa shaye shopendjela sha nanwa ko. 

Opolifi oya hokolola tai ti olutu laye ole lituwa monduda yaye yokunangala e li meemhango, a xulifa. 

Oshiningwanima shikwao, okamatyona keedula 18 oke lituwa ke li meemhango momuti ka xulifa momukunda Oshifo moshitukulwa shaMusati. 

Nakufya okwa tongolwa oye Akoshi Pendapala omukalimo womOshifo. 

Opolifi oya ti Pendapala ina fiya po omukanda tau yandje ouyelele kombinga yefyo laye. 

Omakonakono opolifi otaa twikile moibofa aishe yomalikufo omwenyo. 

Oshiningwanima shikwao, okaana keedula nhatu oka xulifa eshi vati ka wila metale lomeva komukunda Omakuku moshitukulwa shaMusati. 

Nakufya okwa tongolwa oye Maria Israel omukalimo womokunda Omakuku. 

– fhamalwa@nepc.com.na