Kae Maṱunḓu-Tjiparuro

Ondangere  onene ya Ngango mOkaoko, Hijazonguru Kanasareta Kavari, ma suvisiwa muhuka, Oroviungura  pondwa yao mo Kaaru mOkaoko. 

Wa ṱire tji ya ri yetano (5) komueze mbwi, Katjose, nozombura 84. Omukururumendu wotjiwondo tja Hitler ngwi Omukwendata, Omunaakwauti ngu ma yana Ovakwatjivi. 

Eye otja ri ondangere onene yoruzo rwongweyuva (onguramene) yozongombe inḓa ozombonde nozongonga otjondwezu ya Murangere ya Katjikua onḓu yomukuva. Okuyarura Ovambanderu kombura yotjikamba otjizoozu tji tja wira kombanda yavo mo-2011 indu tji va twara Ombara Keharanjo Nguvauva kOngango. Ka Ngango yarwe opo mba paa pe rangerere ondangere Kavari nokuungurirapo ovyombazu pekepeke, nokuhungira ku novakuru novaṱi. Eye wina wa ri Orata Onene motjirata tjouhonapare wa Mbombo.

Ombara Otjitambi yOvambanderu, Aletha Karikondua Nguvauva, wa kumukire rukuru okuyenda kehi ra Kaoko, Oroviungura nḓa zu ko, pa kakarere pombakero yOmukwatjivi omukwao, Kaṱahunda Schaik Matundu. 

Okuzambo a ombo pu notjiwaṋa tje mOkaoko, wina tji tja ri atji zera okuhakaena na ye kutja omayuva womasuviro nga wina ma suvise omuaje we Kavari ngu ma yanenwa mu ye otjomukwatjivi.