Ovakainhu vamwe mOshakati navo paife ova tameka okuya konhopa oko tava landifa omalutu avo.
Ovakainhu vovanyasha ohava kala va ngudumana pomukunghulo wopate lwoponhopa yaKandjengedi tava kongo ovalumenhu opo vaye navo momilele vo va futwe.
Mexuliloshivike Kundana okwa ya ponhele opo hapa kala ovakainhu omo ovakainhu va hokolola tava ti ondjala noluhepo osho shimwe sha eta opo va kale tave li landifa po shaashi ova hala okulonga oshimaliwa shavo tashi pitile moku li landifa po.
Ova ti ohava pula eendado da yooloka she li kwatelela kutya otai momilele nomulumenhu oo loikando inga pi.
“Ohatu mono eekatoma [ovalumenhu] dihapu nomafimbo amwe ohatu hoolola omulumenhu ou twa hala oku ya naye momilele shaashi ka tu hole omulumenhu e na oshimaliwa shishona,” umwe ta hokolola.
Eendado davo, va ti komulumenhu ou a hala oku ya naye momilele lwoikando ivali pefimbo opo ohava pula N$100, omanga ngeenge omulumenhu okwa hala oku ka nangala nomukainhu oufiku aushe ohava pula N$300.
Ova ti omafimbo mamwe ohava futwa oshimaliwa shihapu ngeenge efiku olo va ya momilele nomulumenhu e na oshimaliwa shihapu shaashi ovalumenhu vamwe ohava futu ondado ya pitilila.
Omukainhu weedula 28, e na ounona vavali okwa lombwela Kundana ta ti elandifo lolutu kovalumenhu vayooloka kuye oshi li omukalo mu pu wokulonga oshimaliwa shaye.
“Ohandi longo oshimaliwa shihapu ngeenge nda ya momilele novalumenhu vahapu. Paife ohandi dulu oku li kwafela ame mwene noshoyo okutumina oshimaliwa keumbo shokuyambidida ounona vange,” ta ti.
Okwa yelifa ta ti ongeshefa yoku li landifa po nayo oya fa ashike eengeshefa dikwao molwaashi navo otava kongo ouxupilo.
Omukainhu weedula 30 naye okwa hokolola ta ti ongeshefa yoku li landifa po oya lundulula onghalamwenyo yaye omo paife ha dulu okufuta onduda yaye yohiila noshoyo okuyambidida ounona vaye vatatu.
Okwa weda po ta ti ova taalela omashongo ovalumenhu vamwe vehe hole okufuta oshimaliwa osho va undaneke omanga ovalumenhu vamwe ohava faduka ile ve va ningile omatilifo konima ngeenge va ya navo momilele.
“Kashipu oku ya momilele novalumenhu va yooloka shaashi ohatu kala tuna omhito yoku kwatwa kombuto yoHIV/AIDS,” ta ti. – fhamalwa@nepc.com.na