Elelo lyondoolopa yaNgwediva olya yambidhidha oshikando shuuhaku oshowo shelongo niikwathitho yaaniilonga oshowo iikwathitho yokukeelela omukithi gwoCovid-19.
Omunambelewa omukuluntu nomugandji gwomauyelele Jackson Muma okwa ti oya yambidhidha okapengelo okashona kEluwa nokapangelo okashona kOngwediva nuuapolona oshowo omanyala gongushu N$24 000.
“Oosikola 23 momundhingoloko gOngwediva nadho odha li dha yambidhidhwa noosanataisa dhongushu N$37 000, okukwathela aalongwa ya opaleke oonyala dhawo,” ta ti ngaaka.
Ta ti, osikola kehe okwa li ya pewa endini lyoolita 25, omanga uupangelo wumwe oshowo osikola yopaumwene yedhina Circle of Hope ndjoka yi na aanona ya taalela onkalo ondhigu, oya li ya uvanekelwa okuyambidhidhwa. Muma ta ti, osikola ndjoka oyi na aanona ya talela onkalo itaayi hokitha, Circle of Hope otayi ka yambidhidhwa niitafula yokunyolela yi li iheyali oshowo iipundi yongushu N$5 000.
“Omwaalu aguhe ngoka ogwa thiki koshimaliwa N$66 000,” ta popi ngaaka.
Esiku olyo tuu ndjoka, mayola gwelelo lyondoolopa yaNgwediva Taarah Shalyefu okwa ti omayambidhidho ngoka okwa li ga ningwa onga iizemo yetsokumwe pokati koStandt Lommel ndyoka lyi li koBelgium oshowo elelelo lyondoolopa yaNgwediva.
“Elelo lyondoolopa okwa li lye ya po nokuyambidhidha iikondo mbyoka iyali, okukwathelwa okulwitha omukithi gwoCovid-19, oshowo okushonopaleka ompito yokutaandela,” ta popi ngaaka.
Mayola ta ti, omukithi ngoka otagu dhana onkandangala natango mokati ketu, onkene ogu na okukondololwa nokuyandwa opo kaagu ponokele oshigwana.
Ta kumagidha aanangeshefa opo ya kuthe ko oshiholelwa shoka sha ningwa kelelo lyondoolopa opo nayo ya kale taya ya yambidhidha iikondo mbyoka.
Iikando mbyoka iyali okwa li ya hogololwa opo yi mone omayambidhidho oshoka oya talika ko ya taalela ompito onene yokuponekelwa komukithi ngoka.
– vkaapanda@nepc.com.na