Omakonaakono gopamayalulo ga ningilwa omambo gOngeleki Onkwaevaangeli paLuther muNamibia (ELCIN) oga ulike kutya ongeleki ina yi yakelwa shili omilionaN$3.4 ngaashi sha li sha ihanene uuyuni.   

Okwali wo kwa patululwa oshipotha kopolisi, sha patululilwa aasita naakomeho muELCIN yatatu anuwa molwa oomilona ndhoka dha yakwa po. 

Ihe omushangwa gwa pithithwa ku amushangangeleki Dr. Rev. Johannes Haufiku, iiwike iyali ya pita ogwa ti, sigo opo mpaka kapu na shoka sha ulika omwaalu gwiimaliwa yontumba ya yakwa po nenge ya longithwa po kumima nenge ngandi paumwene. Haufiku ta to eleloshikandjongeleki mokuvulika, olya hogolola ehagano lyiithikamena noli na uunongo miinima yomakonakono giimaliwa, lyedhina Team Training & Management Services Cc, lyo olyo lya ningi omakonakono ngoka.  Ta ti, ehangano ndika olya thikithile oshizemo shomakonakono galyo momutumba gwelelongeleki, ngoka gwa gongalele mOniipa momasiku 06-07 Febuluali 2023.

“Iizemo yomakonakono otayi holola kutya, uuministeli wliniwe mOrepublika yaNamibia owa gandjele shili iimaliwa koshikandjongeleki shokuuninginino momwedhi Mai 2016, nelalakano okufutila omatungo gomathithwahala goosikola mbali dhongeleki kOkahao nokOngwediva, omaopalekululo nokupangela iinima mbyoka ya teka,” ta ti ngaaka.

Iimaliwa ayihe kumwe ya zile kuuministeli gwemona okwali oN$3,468,845.62, sha ikolelela kuHaufiku. 

“Iimaliwa N$3,076,827.14 oya longithwa moompumbwe dhOshikandjongeleki momumbwalangandjo. Iimaliwa N$393,018.48 oya longithwa, ihe kayi na uunzapo (uumbangi) welongitho wa yela. Iimaliwa mbika oya longithwa mokulanda iitungitho, okufuta oondjambi, okwoopalekulula omatungo, okutula po omalugumbo goondhalate, omalweendo, okupangelitha lyiiyenditho, okufuta omahooli giiyenditho, nokufuta oothitha dhomambako ga longithwa momayakulo giigongi yomOshikandjongeleki,” ashanga ngaaka. Ta tsikile kutya shika otashi holola kutya, iimaliwa mbika oya longithwa moompumbwe dhoshikandjongeleki shokuuninginino, shike aakonakoni oya ndhindhilike kutya, opwa pumbwa natango omahitililokonakono ga gwedhwa po moshikumungu shika

“Elelongeleki mokutaamba ehokololo ndika, olya thigi iizemo yekonakono ndika momake geleloshikandjongeleki shokuuningino, opo li tsikile nokuninga omakonakono agehe ga gwedhwa po ngaashi sha uthwa kaakonakoni, notashi uthwa komilandu dhegongelo nelongitho lyiiniwe pangeleki,” Haufiku ta nyola.

Haufiku okwa ti omapopyo nomalundilo ngoka guufuthi oga yemateke elongongeleki pamwe “naayehe mboka ya yonenwa ombili koonkundana dhomasheko nokushundula Uuyapuki wOngeleki.” “Ongeleki yaELCIN oya nongele noluhodhi nkene ya kala nokupopiwa nayi moradio nomiifonkundana yOshilongo, unene tuu okutameka momasiku 31 Januali 2023… Manga iikunduneki yomoshilongo inaayi kundaneka ehokololo ndika, elelongeleki lyaELCIN olya adhika lya winopalekwa kombinga yoshinima shika,” ta fatulula ngaaka. Ta ti, momutumba gwalyo gwa gongala mOniipa momasiku 15-16 Aguste 2022, Elelongeleki olya yakulile ontumwafo ya nyolwa momasiku 3 Aguste 2022 komusita Josef Shikuma, omusita omuwiliki gwegongalo lyaELCIN Eheke, mOshitayingeleki shaNgwediva, ngoka e li wo oshilyo shokangundu kiiniwe moshikandjongeleki shokuuninginino, ta indile elelongeleki lyaELCIN li ninge omakonakono kombinga yiimaliwa mbika. Shikuma anuwa okwa holola kutya, ope na iilyo oyindji yongeleki yawo ya hala iimaliwa mbika yi ningilwe omakonakono, oshoka ope na omafekelo kutya inayi longithwa moompumbwe ndhoka ya nuninwa. 

“Nomolwaashoka elongelongeleki lya ningi etokolo lyalyo pantopolwa onti-79.3/2022 opo eleloshikandjongeleki shokuuninginino li ninge omakonakono melongitho lyiimaliwa mbika, noku gandja oshizemo shekonakono ndika kElelongeleki,” ta popi ngaaka.

ELCIN ota indile wo iilyo ye ayihe yi ngungumane nokutegelela nombili iizemo yomakonakono agehe ga gwedhwa po moshinima shika. Elelongeleki olya ti, olya yemata pamwe naayehe mboka ya yonenwa ombili koonkundana dhomasheko nokushundula Uuyapuki wOngeleki.

Haufiku ina monika a tye ko sha komushangwa ngoka pethimbo oshifo shika sha ya komanyanyangidho, ihe onzo yi shi okwi inekelwa oya koleka kutya omushangwa ngoka ogwoshili.  

vkaapanda@nepc.com.na.