Victoria Kaapanda
Nonando etokolo olya ningwa kutya oosikola nadhi tameke okuya kehe esiku, uuministeli welongo owa lundulula etokolo ndyoka omolwomukithi gwoCovid-19 natango tagu dhana onkandangala.Omukuluntu gwelongo moshitopolwa shaShana Hileni Amukana okwa ti, shoka okwa li sha tokolwa oshoka aanona yamwe oye li moongundu odhindji unene, omanga taku indikwa omangundumano, moka hamu taandele unene omukithi gwoCovid-19.
“Otatu kondjitha okuteyagula omangundumano. Itashi dhengele kutya osikola ayihe oyi na okukala ya pititha po esiku, ihe oongundu ndhoka dhi na aanona oyendji ashike,” ta fatulula ngaaka. Amukana okwa li a gandja oshiholelwa kutya ngele posikola ope na oongundu dhi li ndatu dhondondo ontiyali adhihe, ihe mongundu yimwe omu na ashike aalongwa ye li 23, mboka oya pitikwa okuya kosikola kehe esiku, oshoka aashona momwaalu.
“Omanga mboka ye li mo 42 oye na okutopolwa opo ya pitithe po esiku, oshoka mongundu oye li mo oyendji,” ta ti ngaaka. Ta gwedha po ta ti, oosikola ngaashi dhopawumweno odhindji, ohadhi yi kehe esiku oshoka aanona kaye li po oyendji posikola nenge oyendji mongulu yimwe. Amukana okwa li a popi ngaaka okuyelithila oshigwana, oshoka aakuluntu oyendji oya li ya tumpakana koosikola dhimwe tadhi longo kehe esiku omanga dhimwe tadhi tsikile nomulandu omukulu.
Presidente Hage Geingob oshiwike sha zi ko okwa li a tseyitha kutya oosikola adhihe nadhi tsikile okulonga kehe esiku, oshipala noshipala. “Otandi kumagidha oshikondo shelongo shi tsikile nokudhiginina okugwanitha po oompango nomalandulathano okukeelela omukithi gwoCovid-19,” ta ti ngaaka.
Ta ti, aalongi naya sile aalongwa oshimpwiyu okukondolola omukithi ngoka, kaagu ya ponokele. “Otandi kumagidha natango aalongwa unene ye li moongundu dhopombanda ya ka tuntilwe oshowo aalongi naakuluntu ye li moshikondo shelongo, okugamena mboka ye li popepi nayo,” Amukana ta kumagidha ngaaka.
Kundana sho a li a ningi omapekaapeko poosikola dha yooloka moshitopolwa shaShana, oosikola odhindji otadhi iyutha koompango nomalandulathano ga tulwa po okukeelela omukithi ngoka kaagu taandele.