Elelo lyondoolopa yaShakati olya ti, momasiku omashona komeho otali ka tsikila  okutembudha aantu momalukanda gontumba noku ya fala kOnawa.

Onawa Olukanda lwa totwa po omimvo dha piti nokwahoka aakwashigwana okuza komalukanda ga yooloka mOshakati.

Omukuluntu gwelelo lyondoolopa yaShakati Timoteus Namwandi okwa ti, oya thaneke okutembudha aakalimo ye li 410 okuza molukanda Oshoopala.

“Aantu ye li 49 oya tembudhwa nale, otatu ka tsikila okutembudha omagumbo ge li 160 molweetho olutiyali oshowo 250 molweetho olutitatu,’’ ta ti ngaaka.

Ta gwedhwa ko ta ti, elalakano lyokutembudhila aantu kOnawa okuza kOshoopala, ooshoka kutya ehala ndyoka kakwa li lya nuninwa olukanda, ihe okwa li ehala lyomangeshefelo.

“Omahala ngoka taga tembukilwa otwe ga longa nale ga pwa ngele tashi ya komeya, omalusheno oshowo uundjugo,’’ ta ti ngaaka.
Ta ti, ayehe mboka taya ka tembudhwa otu na nale omwaalu gawo.

Ta gwedhwa po kutya, kape na ngoka ta ka za miihwa ta ti naye okwa hala okutembudhilwa kOnawa omanga inaa ndhindhilikwa nale.

Nonando aakalimo yomolukanda Oshoopola taya tembudhilwa kOnawa, mboka ye li ko oya kala nokunyenyeta kutya otaya etelwa oombudhi. 

Olukanda ndoka Oshoopala olwa nyenyetwa ethimbo mOshakati, oshoka olwa talika ko onga lwa nika oshiponga nolwa edhilila aafuthi.

Oyendji natango oya li ya dhike omagumbo gawo molukanda ndoka, nonando ya indikwa kelelo lyondoolopa omolwomatompelo ga yooloka.

Omugandji gomauyelele melelo lyondoolopa Katarina Kamari okwa ti, oshigwana oshindji ngashiingeyi osha tembudhilwa kEhenye omolwomeya gefundja ga yi momagumbo gawo.

“Uupyakadhi mboka oye wu iyetela yoyene oshoka oya dhika oombashu dhawo pomahala ya indikwa. Oyendji oya dhika mondjila yomeya,’’ ta ti ngaaka.

Kamari okwa indile oshigwana shi kale aluhe tashi uvu elelo lyondoolopa sho tali ya kumagidha okuyanda omaupyakandhi monakuyiwa, ngaashi okukanitha iinima yawo, ngaashi komeya gefundja.

Ta ti, ngele omahala ya hala, naya ninge omayindilo okupitila momukalo gu li mondjila, otaya pewa, omahala ihaga tindilwa.