Victoria Kaapanda

Konima yomimvo dha thika po20, ehala lya kala olyo alike lyomayinyanyundho mOshakati, lya kala monkalo itaayi hokitha, olya longulululwa nokuopalekwa kelelo lyondoolopa lyaShakati koshimaliwa shi thike poomilliona N$3.6.

Ehala ndyoka “Caribbean Recreational Park” olya patuluka pambelewa Olyomakaya, nokwa li lya hili oshigwana, she ya okutala sho lya opalekwa, oshowo okutala ehala lyomuuhalo gwawo epe.

Minista gwiipindi niikwafabilika Lucia Iipumbu, ngoka a li a patulula ehala ndyoka pambelewa okwa ti, omahala gokwiinyanyundha oga pumbiwa moshigwana. “Omahala ga tya ngaaka ohaga yambidhidha wo natango kuundjolowele womuntu, oshowo ohaga gandja oompito dha yooloka kaanona oshowo kaanyasha opo kaaya kale momapandaanda moka hamu zi omashongo ogendji,”ta ti ngaaka.

Ta ti, ehala lyatya ngiika natango otali humitha komeho ondoolopa yaShakati. Oshakati inashi kala nehala lyomayinyanyundho, nkene ndoka ekulu kwali lya teka po. Iipumbu esiku ndyoka okwali aakumagidha aakalimo yomOshakati ya longithe ehala ndyoka poompito adhihe tadhipumbiwa.

Omunashipundi mokomitiye yookansela melelo lyondoolopa yaShakati Hofeni Mutota okwati, oya longitha ehala ndyoka sho kwali ya ndhindhilike kutya ehala ndyoka otali ka lundulula oonkalamwenyo ndho yendji, una taye li longitha.

‘’Omahala gatya ngiika oga kala ga kolota, mondoolopa yaShakati, sho shoka ya longo nuundhiginini okuopaleka ehala ndika opo liye ponkatu ndjika,” ta ti ngaaka.

Mutota ta ti, shika inashi hulila ashike mpoka, ihe natango okuna omahala gaali gomayinyanyundho geli metifa okulongwa, no geli pokupwa.

Elelo lyondoolopa olyina ohokwe oku eta omauwanawa gatya ngaaka mokati koshigwana , ihe oshimaliwa osho sha kala tashi shongola.

Tali indile omayambindhindho moshigwana oshowo kaanangeshefa opo ya yambindhindhe naashoka yena oku eta omauwanawa gatya ngaaka momindhinoloko adhihe dhaShakati.

Omuwiliki gwehala ndyoka Caribbean Park, Steven Nangolo esiku ndyoka okwati, ehala ndyoka otali kondololwa kehangano lyoAishaa trading CC. ‘’Otatu kumagidha ashike oshigwana shi longithe ehala ndika nawa oshowo okuli kaleka po opo lyi longitwe wo monakuyiwa,” ta kumagidha ngaaka.

vkaapanda@nepc.com.na