Omukuluntuwiliki muuministeli womindhingoloko ,iihwa nomapashiyonoJohnsonNdokosho okwa kumagidha oshigwana opo shi kwate nawa omililo kaadhi fike nokumbugaleka oshowo okufaalela oomwenyo dhaantu. “Nomvula ndjoka ya kala ko, omwiindhi ogwa kukuta natango onkene otagu kwata mbala omulilo, oshilongo otashi lopotwa tashi pi koombinga noombinga,” ta popi ngaaka.
Ndokosho okwa totha mo kutya ooheketa dhili oomilliona 498 385 odha pi omanga omumvo gwa yi ooheketa oomilliona dha li dha pi. Ta ti, omulilo ohagu mbugaleke, uupyakadhi mboka tau vulu oku eta ondjala yiimuna oshowo okufaalela oomwenyo dhaantu. “Otandi kumagidha oshigwana shi kwate nawa omililo uuna taye dhi longitha, okuyanda uupyakadhi woludhi ndoka,” ta kumagidha ngaaaka. Ta ti oshigwana nashi kale sha ndhindhilika kutya omulilo ohagu taandelekwa kombepo, onkene nashi kale tashi kondolola omililo uuna tashi tema, nuuna sha mana okutema, okukwashilipaleka kutya omulilo ogwa dhima thiluthilu,” ta kumagidha ngaaka. Ta gwedha po ta ti, okukeelela okuvule okupanga, onkene ngele shika osha keelelwa itashi holoka.
“Omulilo ogu na okukondololwa opo kaagu holoke, onkene shika nashi tameke okuza megumbo kehe.
Oshigwana nashi kunkule omwiidhi pooha dhomagumbo oshowo kehe pehala omulilo tagu vulu okuandjakana gu et omawupyakadhi,” Ndokosho ta popi ngaaka. Omunashipundi gwehangano Greenspace Vera Freyer okwa li a pititha omushangwa kutya, koAvis Dam okwa kala ku na omulilo tagu fike omasiku ga landulathana oomwedhi mbali dha piti.
“Omulonga ngoka hagu ende omeya sigo ondjila yeshina lyokolutenda nondjila yokuya koGobabis okwa pya thiluthilu,” ta ti ngaaka. Ta ti, nonando omulilo ngoka inagu shiwika mpoka kwa li gwa zi, ombinga yimwe yokuuninginino yondama kakwa li ya pya.
“Ndeshipanda Fillipus gwomukunda Alusaati okwa ti ethimbo ndika ohali kala etilithi kuyo, oshoka omulilo ihagu ziilile ko, oto mono ashike omulilo gwa yaka mekoye nenge gwa thika nale megumbo.
“Ihatu kotha we twa mbonyoka oshoka omililo ndhoka kadhi shiwike mpoka tadhi zi.
Otandi kumagidha wo natango aakuluntu momagumbo ya kale ya tula nawa uupalwa kaawu dhanwe kaanona,” ta kumagidha ngaaka.
Omvo gwa zi ko omukulupe gumwe okwa si sho kwa li a pile megumbo konima a shi nyanyaleka momukunda Ondulu nOmongwa.
“Omulilo ogwa ningi uupyakadhi uunene moshikandjohogololo muka. Omukulupe ngoka okwa li a pi ethimbo ta kunkula omwiidhi pooha dhegumbo lye, sigo omulilo gwe mu nyenge e tagu mu fike,” ta hokolola ngaaka.
Ta ti, elalakano okwa li lyokwoopaleka pooha dhegumbo lyawo, nomukulukadhi gwe sho a tondoka onkugo konima sho a li a uvu omusamane gwe ta kugu, okwa adha nale a pya shi nyanyaleka nokwa li a ka hulithila koshipangelo.
Etosha okwa li kwa lopotwa lya pya ohekta 487 732 omumvo gwa yi.
Otaku hokololwa kutya omulilo ogwa li gwa pimbile unene okuza poomwedhi ndhika dhahugunina dhokomumvo sho ku na ombepo.Omulilo ohagu taandele mbala oshoka omwiidhi ogwa kukuta nogwa ningi ogundji sho omvula ya li ya loko nawa omumvo gwa yi.