Osikola yoshiputudhilo shopombanda International University of management (IUM) mOngwediva otayi dhimbulukwa nokutyapula oshiwike shomuthigululwakalo momikalo dha yooloka, ngaashi okuulika iikulya, iidhano oshowo omizalo dhomihoko dha yolooka.
Omunashipundi oshowo omuwiliki goshiindingili shoka Jesaja Ndunga okwa ti, shika oshikando oshititano IUM mOngwediva tandhi mbulukwa omuthigululwakalo, nonando omimvo mbali okwa li sha kalekwa.
“Nuumvo omuthigululwakalo otagu dhimbulukwa nokutyapulwa kohi yoshipalanyolo ‘’Ohatu manga uukume okupitila momihoko dhili kumwe’’, okuza momasiku 12 sigo 17 gaSepetemba nuumvo.
Elalakano okumanga uukuume kumwe nomihoko adhihe moshilongo okupitla mombili, menyanyu oshowo melongelokumwe.
Ta ti, nonando oya longekidha iilandithomwa, elalakano kali shi lyokuninga oshimaliwa ihe olyokuulika nokusimaneka omithugululwakalo dha yooloka dhAanamibia.
‘’Otatu tyapula oshiwike shika nenyanyu. Oyendji otaya monika ye li menyanyu sho taya ulike omithigululwakalo noku dhi simaneka konima kwa li sha indikwa omimvo mbali dha piti,’’ ta fatulula ngaaka.
Ndunga ta ti, otaya tyapula wo pamukalo gomaudhano gomihoko dha yooloka.
Ta ti, omihoko dha yooloka otadhi ulikilathana shoka omihoko omikwawo kaadhi shi. “Omihoko ngaashi Aawambo, Aaherero, Aahimba oshowo Aakavango oya zala omizalo dhawo, yo taya fatulilathana shoka hashi ningwa naashoka ihaashi ningwa momihoko ndhoka,’’ ta popi ngaaka.
Ta gwedha po ta ti nguka ogo omukalo gokutseya omihoko moshilongo, shoka tashi eta ombili nelongelokumwe oshowo okuuva ko kutya aantu ayehe Aanamibia, aamwayinathana ihe elaka olyo ashike lya yooloka.
Ndunga okwa ti, momasiku sho taga ka kala 17 gaSeptemba , otaku ka kala omathigathano goka kandhona ndhingi koshiputundhilo shoIUM.
“Natango otaku ka kala wo, iinyangandhalwa ya yooloka oshowo aahikingalo ya yooloka aaNamibia, yaza koombinga noombinga,” ta ti ngaaka.
Hugunina okwahiya wo oshigwana ashihe opo shi tyapulile pamwe nayo oshiwike shika shokusimaneka omuthigululwakalo