Kae Maṱunḓu-Tjiparu
Hapo nambano otjiwaṋa tja Tjimana nOuhonapare wOmbazu wa Hoveka mau utu okukayambera kombara yavo Kanangatie Hoveka pOtjosazu?
Ihi ootjiṋa nambano Ovatjimana tji mave sokuripurirako nokuyoora indu Osondaha nda zu ko novazapamwe varwe pekepeke tji va kaisire ko onguyu keendo re. Pu pa ri Ombara Otjitambi yOvaherero, Hoze Riruako, Orata Onene yOuhonapre wa Kambazembi wOmbazu nOngwatjindu Riundjee Katjaimo ngwa kuramenene po Ombara Sam Kambazembi, Ombara Vipuira Kapuuo ngwa yandjere ombinika yOmbandi na Tanii Hoveka ngwa kuramenene po Ombara Otjitambi yOvambanderu Karikondua Nguvauva.
Oritjatano ondwa otji ya katurire mOkandjira tjinga Ombara Kanangatie otjomundu ngwa ṱa mo-1903, omuhoko tjaau hanga ovita ku nOvandoitji a ha perwe ondjozikiro nombakero ndje mu pwire.
Okuza mOkandjira ovanane votjiwaṋa tja Tjimana kehi yomahongorero wondangere Tjivekara Hoveka opaave zu okuyenda kOtjosazu. Oritjatano otji va yakisire omuriro nokurihepura kovakuru novaṱi nave tjiti vyarwe vyombazu.
NOroviungura ave tjirwa nokurihepura tjazumba ave kumukire kOtjosazu. Tji va yarukire kOkandjira ape katokerwa omazemburukiro wovita vya Hamakari na wina omaserekarero worukosi rworuhindo rwOmbara Kanangatie ngandu tji rwa kamunika naku tuwa ourenga.
Osondaha arire omaisireko womakutu pOtjosazu wina tji kwa tjirirwe amaku riweza ovimbumba, kombunda yanao arire omahungi nozombinika wina ouyenda worukosi rwokupaha ehuno au serekarerwa rukwao Uhupuavi Katjivirue movitjitwa mbya nanenwe i Himee Kamburona.
Ovahungire vevari Katjaimo na Riruako va tjivisasanene mourizemburuka kutja ohepero oviwaṋa vyOvaherero nOvambanderu, tjinene ovanane vombazu okuisamo oviwaṋa vyavo monḓomo youhepauke.
Norondu uriri ovo tji va zu mo mozondjaka nai mu va twa oviwaṋa vyavo mbi.
Kutja ve ze ko komahembasaneno nokupirurasana ngunda omihoko imbi ovyarwe avi ripurira kehupo roviwaṋa vyavo.
Ombara Riruako wa yanisire kutja pu pe nozombata nomahembasaneno eye kamaa roro okutamunwa nungwari eye ondando ye okutunga ondopa yondjesirasaneno nohanganeno. Ne riheke koviwaṋa mbi kutja vya rwa rukuru nambano oruveze rwa horo kutja omihoko vyarwe arire mbya rwisasana ku nOvaherero nOvambanderu nambano ave tji rire ovatarere.