Kae Maṱunḓu-Tjiparuro
Motjinamuinyo atjihe otjinene omuṱuta tja randisa ohoromende mai tjoza ko N$500 novinamuinyo avihe mbya randisa kavi sere okutanana o 75.
OMinisteri yOtutumbo nOvikunwa, Omeva nOmatungururiro wEhi ya raisire nao mondjivisiro yayo yombatero yourumbu.
Kongombo poo onḓu aihe omuṱuta ndja randisa oyo mai tjoza ko N$100 novinamuinyo oviṱiṱi avihe omuṱuta mbya randisa kavi sere okukapita o 375 kutja ozongombo poo ozonḓu nḓa hovekwa okuranda.
Ombatero omuṱuta auhe ndji ma munu okuza kohoromende otjokuundurira ozopereisa kombanda kai sere okutanana N$37500-00 (ape Ozondora za Namibia omayovi omirongo vine).
Ovaṱuta mba ṱunwa i yourumbu keṱupa mave yenene okuvaterwa i yohoromende nehozu novikurya vyozongombe uriri korutumbo ndu ha tananene ovinamuinyo ovinene o-26. Tji mave havara ombatero yomakutu omurongo wouzeu wozokirongrama o-50 momueze okuvatera ozongombe ozonḓenḓu omakuryona uriri o-26.
Mekutu oyo ku mai tjoza ozoperesende o 50 zotjimariva ekutu ku ra randwa poo o N$200 mekutu. Otjimariva tjovitunge vyorutu momueze o N$200 oure womieze hamboumwe. Mave vaterwa nozombara zehozu omurongo zouzeu wozokirongarama o 18 momueze tjingetjo kovinamuinyo omakuryoma mbi he ri kombanda yo 26.
Ohoromende ku mai tjoza ozoperesende o 50 uriri zotjimariva ehozu ku ra randwa poo N$100 mombara. Ombatero aihe momueze ndji ha sere okutanana ozondora za Namibia eyovi rimwe. Ombatero wina ndji mai yandjwa oure womieze hamboumwe.
Mbu mave tjindisa ovinamuinyo okutaurisira ku mavi kakwa, mave vaterwa notjimariva tjovitoore tji tji ri ozoperesende o 50 zo N$19 mokirometa ketemba enene eturike romitwaro no N$9 mokirometa ketemba eṱiṱi ndi mari nana otjikoto.
Ku ma ku tjindisirwa ovinamuinyo ka ku sere okurira kokure okutanana ozokirometa o 500.