Ounona voukadona vavali veedula mbali vati ova kwatwa onghonga oshita komulumenhu omukwashiwana waAngola ha longo meumbo omo hava di.

Oshiningwanima eshi osha ningilwa momukunda Omupini moshikandjohoololo shaKongo moshitukulwa shaHangwena efimbo lomutenya Omaandaxa.

Etivali okaana keedula heyali vati oka kwatwa onghonga kuxekulu meumbo lavo momukunda Elwafa moshikandjohoololo shaMulonga moshitukulwa shaHangwena.

Omukonakoni woimbuluma wopolifi moshitukulwa shaHangwena omupeduCommissioner Zacharia Amakali okwa hokolola ta ti omukainhu ha longo meumbo okwa fiya ounona meumbo muhe na omunhu konima eshi kwa li a ya poushiinda.

Okudja opo omufekelwa mboli okwa ya keumbo noku ufana ounona monduda yaye noku va longela omunyonena wopaixulo eshi e va kwata onghonga.

Okwa hokolola ta ti ounona aveshe ove uya nomukainhu ou ha longo meumbo omo, okaana kamwe okaye omanga kamwe okamumwaina ashike oye te ka tekula. Opolifi oya hokolola tai ti omukainhu eshi a alukila meumbo okwa hanga ounona itava dulu okuenda konima va kwatwa onghonga, nokwa lopotele opolifi.

Omufekelwa okwa kwatwa po nota holoka momhangu yaKongo Etitano, ota pangulilwa oshibofa shekwatonghonga.

Opolifi onghee ngaa tai kumaida ovadali opo vaha fiye vali ounona momaumbo muhe na ou te va tonatele shaashi ounona paife ova ninga oihakanwa yokukwatwa onghonga.

fhamalwa@nepc.com.na