Kae Maṱunḓu-Tjiparuro
Oserekaze Karipi Uazikiza ma ningire ovahona okuuta okupahasana.
Nandaku kakoo kutja ohaṋi oyo ndja ri ondimwa yehungi re kai nyanderwa, o tjo tja ekopi romuhungire weyuva atja riyenda koserekaze.
Uaizikiza, mehungi re Osondaha ngwa kutire ovahona nozombara pekepeke kumwe mongwatero yazo na kumwa kutja nu hapo ndoovazu ovo va rara ezumo rimwe nave nyamu kevere rimwe otja tji ma tjiwa nowo oveni wina otja tji ve rihangununa oveni nu tji ve ha wana ongwaye? Ngunda nomihoko vyarye tjmuna Ongwena ndji va ri novita kumwe ava hangana?
Ya ri ongahukire ku Uazikiza kutja ohaṋi ndji ri motjiwaṋa eye we i yakana ku katjootjiri okuza kOroviungura tjeere kembo posi ya omambo ingo we ye pwikirire Osondaha nu a usuka auhe. Pendje nohaṋi ndji ri mokati kotjiwaṋa wina wa kendwa i yeyuva ndi, ndi yenda ama ri henunwa onḓengu yaro ku ku heri i yovandu varwe posi ya imba mba sere okuriyozika otja tji ve riperwe i yOmbara Otjitambi omuyaruke Hosea Katjikururume Kuṱako otjondengero ku Samuel Maharero.
Mongendo ye ndji yohaṋi ndji ri motjiwaṋa Uazikiza opu ma ningirire ozombara okutji ve pahera eyuva otjozoserekaze motjiwaṋa kutja ve hungire ku na wo, ovo ve ete inga nge ri motjari tjao. “Twendee kovandu, twendee kovakweṋu twendee. Tengee oviwaṋa vyeṋu. Nu tu paheee wina. Arikana vahona vandje katji mu pahasana. Pahasanee norusuvero. Yevasanee oweṋe omuhoko,” Uazikiza ma tja.
Ozohoromende azeembari, ya Namibia nOyehi rOvandoitji nḓa ri aza kuramenwapo i Frans Kapofi, Oministera yOvarwe Ovakuru, nomukuramenepo wEhi rOvandoitji mOnamibia, Onongo Andreas Gotze, za isire ozombara nomambo movyari vyazo tjinga ozombara tji maze keya kembo tjandje nandarire okuzirira komambo wao, tjandje Kapofi na Gotze va hungire va i. Kakutja ngahino omambo wozombara owo nga ri aya tanderwa owo mave keyezuva motutavi twomiti.
Omazemburukiro wozombura esere zOmbara Otjitambi Samuel Maharero ya ri otjitjiwa tjapeke tji tja utire mOkahandja noviṋenge pekepeke mu mwari ozondangere okutura indi Oritjavari nOritjatatu Ombara Onene Tjinaaṋi Maharero a tjirwa ama yakisa ezuko rao. Oroviungura ngurova pa tokererwe otjihungiriro ongondoroka na Samuel Maharero nozonongo Jeffries Ramsey okuza kOtjauana, na Utjiua Muiinjangue, mu varwe, omba twamene ondanga mezuko.