Mokati kozonguti hambombari nḓa tukisirwe pombakero yomuhonge omunene Peter Katikisa Daniël Tjijombo wOfather Tjijombo St. John Faith Mission Osondaha tji ya ri 6 komueze mbwi mOtjiuaneno, mbari zazo za kahaamene kovandu vevari.

Tji za zire nokutukisiwa poo okuisiwa i yovanatje ve ovakazona mba ri ave ze ṱiza, imwe ya kahaamene kotjikaiva tjomuhepundu oserekaze yomuyaruke Tjijombo Hizembi, ngunda indji oyarwe aya kahaamene kekori ra Christopher Johnny Ntuane, okaṋepo kemwe kotjimbumba tjozohiva ihi Diphiri tjombongo ndji Ost. John Apostolic Church of Prophecy ya Sebokeng yOrukondua rwa Gautenga mOsouth Afrika. 

Ozonguti nḓa za yandjerwe i yovakazona vomuyaruke Omuhonge Omunene Tjijombo okumuṱika na zo tjiva zazo nḓu ve kezeisire kouye womuronga.  

Onguti ombapa ohapo i heya omautiro omape, ohange, orusuvero, ouṋingandu, otjiyangapara nu tjinene ongamburiro. 

Tjimuna otja korukarorwa kombunda yomupupo wa Noag, Noag tja hinda ekwara nonguti okukatara kutja omipupo vya pwira poo indee nu indi ekwara ari kakarerera nungwari indji onguti ai kotoka kotjitendeze nondaze yokutja omipupo vya pupavara. 

Tjingetjo imba ku kwa haamene ozonguti otji mape munika kutja omuhonge u ri pu na vo oure womuinyo wavo, me ve tjevere nokuvepa ouṋingandu, orusuvero na avihe mbi tjama nongundi ombamba.