Ngaashi naana hashi ningwa omudo keshe, noneudo, Elelo laUkwanyama ola dimbuluka efiku lohamba Mandume Ndemufayo olo la li ko Olomakaya kouhamba kOmhedi.

Koshiindingili shoneudo kwali ovaleli vadja komalelo opamufyuululwakalo a yooloka.

Moshipopiwa shaye sha leshwa kelenga loshikandjo eundaneko George Nelulu, Ohamba yaUkwanyama Martha Mwadinomho yaKristian Nelulu okwa ti elalakano lefiku okuyandja efimaneko kohamba i kulu Mandume Ndemufayo.

“Efiku e li ola fimana kelelo laUkwanyama shaashi oli na ondjokonona ya kula pefimbo ohamba Ndemufayo ya dana onghandangala mekondjelo manguluko pefimbo loita,” Nelulu ta ti.

Okwa ti efiku e li oha li dimbulukiwa omudo keshe momwedi Februali noha ku ningwa oshivilo sha kula eshi oveleli vopamufyuululwakalo hava hangana noku tanga ohamba Ndemufayo.

“Osha fimana ngeenge ovanyasha nounona opo va kale koshivilo shedimbuluko lefiku laNdemufayo shaashi oha ku popiwa ondjokonona ya fimana no va pumbwa okukala ve i shi,” ta ti.

Okwa yelifa ta ti osha fimana ngeenge ovanhu ve shi ondjokonona yo valeli vopamufyuululwakalo unene eehamba odo da xulako nale.

Ohamba Mandumwe yaNdemufayo oya xulifa momudo 1917. 

Konima eshi ohamba Ndemufayo ya xulifa okwa pita eedula 100 elelo laUkwanyama lihe na ohamba, nokudja momudo 1998 Kornelius Shelungu okwa ulikwa a ninge ohamba yovakwanyama fiyo momudo 2005 eshi a xulifa. Momudo 2005 mekulu Martha Mwadinomho Kristian Nelumbu okwa ninga ohamba yovakwanyama noku li ta wilike fiyo opaife.

Lwopokati opo, Nelulu okwa weda po ta ti elelo ola didilika ovanyasha tava longo oilonga yoimbuluma ngaashi okudipayafana, onghee okwa ti eshi otashi ulike efano lii melelo laUkwanyama.

“Ovakulunhu nava kale tava popi nomaludalo avo momaumbo. Ovanhu nava fimanake omilandu dopamufyuululwakalo momaumbo ngaashi okuxungila,” ta ti.

fhamalwa@nepc.com.na