Kae Maṱunḓu-Tjiparuro
Hapo ovanane moviṱo vyao avihe pekepeke ve ri pi oruveze oruzeu rourumbu ndwi ndwa twa ko omutwaro omuzeu kovaṱuta?
Indi eepuriro nda ingana motjiwaṋa tjinene tjovaṱuta. Omukurundu umwe omuṱuta Omandaha otja twire ondanga mezuko okutuurungira mOmurari Wondjivisiro Ombaranga. Eperi Ngaujake, nguri omunane omukuru nu umwe wovanane ovatenga wehika rovaṱuta indi oNamibia National Farmers Union (NNFU), wa pe ovanane nganduu komayandero wotjiveke ihi tjazumba eye ma tjiti tjimwe poo tjarwe. Ouzeu mbu mau uru na Ngaujake ombatero yohoromende yourumbu eye ndji ma tja ya sana na uriri. Tjinene tjinga otja kohoroemnde omuṱuta auhe kutja ma vaterue rutenga ama sokuraisa kutja eye ovikwaye mbya randa otjovikurya vyovinamuinyo.
Ku Ngaujake kwe rikwamba umwe wovaṱuta mba yata ozondambo ozongoto motjitamba hi, MbungaTjamuaha. Ngumatja mena rokuhina rombatero kombatero yourumbu yohoromende, ovaṱuta maveso oku iyara ave hei kambura kaparukaze, nave kawondja komurungu otja tji ve rikondjera. Tjamuaha ma tja ombatero yourumbu kutja i vatere katjotjiri, ya sere ku sana ku indji ondengandenga ohoromende ndji ya vaterere nayo ovaṱuta mourumbu ousupi kombunda yongutukiro. Oyo mena romaungurisiro omavi iyovaṱuta ndja ka munika ozohaviho nohoromende ayi isa po.
Ovanane Ngaujake ku ma kuu kutja ve sekame ovo mbazu, otutu twovaṱuta, ozorata zoutukondwa no u nepo wOnjduwo yOzoveta. Nungwari vevari vovanane imba, Orata yOkarukondwa kOmatoorrero ka Kakarara, Ramana Mutjavikua, nOmunane wOkehi worutu rovaṱuta rwa Tjozondjupa, Otjozondjupa Communal Farmers Union, ousupi oOCFU, mave tja kave mwinine uriri nungwari ve kondja okapaze kokapaze okutuurungira momirari mbi ri vyo pendje nOmomurari Wondjivisiro Ombaranga. No mozongondjero zawo ndino ndi Otjozondjupa wina otjorukondwa ru zemburukwe kutja tjingetjo mu nourumbu. Kutja okuutira ketenga romueze mbwi wina ru yenene okuuta okumuna ombatero yourumbu. Ngunda otukondwa twarwe a twa zemburukwa rukuru kutja twa haverwa i yourumbu, mu Kozonyanga otji twa uta okuhavara ozombatero zourumbu okuza kohoromende. Okutja nai ovo otji ve ri moruuma rourumbu mbwi okapaze konguti.