“Eṱe ohorokweva ndjo yokehi nandarire tji ya rire onde pu indji yokombanda, ku eṱe mombazu yetu omundu ngo u munikwa tjimuna u ri mapeṋe poo ke ri nawa mouripura,” Ombara Turimuro Hoveka ma tja nao. 

“Imbyo oviṋa vyarwe kaparukaze. Aye, imbi kavi yandjerwa toho, tjiritjiri kaviṋa.” Ombara Hoveka ma wezako. 

“Mbwae nu!” Lesley Tjiueza, katjisupi ngwa tjiukisire onḓengura indji Tjipangandjara, ndji ri ohunga nombazu wa tja nao ousupi aayo wa ramwa. “Atati!” eembo porwaro Onongo Naomi Kaukuata- Tjiṱunga, omupyuke mombazu nda tene. “Ovikwaye imbi vakwetu,” Vaja Katjimune wa himwa tjingewo. “Tjimuna kave nohoṋi tjiri,” Onongo Kuiiri Tjipangandjara ma tja tjingetjo. Omo Kakujaha-Maṱunḓu matja kakookutja ovikazerere vya zara otjikaiva nohorokweva posi ya hapo tjiri omurumendu tji ma vaza pondondo indjo tjandje wa hapa vi nu ma hepa ombatero yotjiwaṋa okuutira kokuteza kutja wa tjitwa i ye nao. 

“Mouatjiri hi nouzeu novikazerere. Posi ya ngave horere ombazu indji mu ve isa omasa ve ise otjirumatwa tjetu,” Barnabas Mungunda omiṱiri notjiuru tjosikore otjikuru ma tja. Okaṋepo kOmbongarero yOtjiwaṋa, Nono Katjingisiua, ma tja: “Ombanda ndjo tji mo zara rukuru rutenga oo sokusaneka. Tjazumba otji mo zara. Eṱe twa sanekisiwa ovikaiva kutja tjazumba tu zare indji ombanda ndji. Nu imba va saneka? Va yandjerwa? Omundu auhe ka sere okuritoorera ombanda ndjo a utu okuzara. I nomazeva, i sanekwa, imba ovanatje vauṋe nu va sanekerwa pi?” 

Collin Marenga ma tja ovanane vombazu nomivanda ombe ha sere okuhina okuyandjera omivanda vyavo okutombwa i yovarumendu mba zara ozohorokweva. Mehungi kuno ngoramambo indji o Windhoek Observer Oritjatatu, umwe ozongaro inda, nu gwari aa zara ohorokweva, Wendelinus Hamutenya, watjere eye wizarere mondengu yayo motjitamba tjomizaro tjinga yo motjitamba ihi airitupukira. “Me teya ongaro yourume noukaze otjamwe otjikata ohongora mo Namibia. Mbino omasa omanene wokuteya ongaro momuzaro wombazu. Momakuruhungi, omuzaro wombazu wari wa hanewa kaparukaze mo wo Herero nOumbo, nourume noukaze ayeri ombutia kutja ngumazareye oune,” Hamutenya matja.