ν Kae Maṱunḓu-Tjiparuro

Mo-2019 otji va karyangerere kOeiseba nave zuu oruuro rwovature novaṱuta ohunga nokukarandisa ovimamuinyo vyavo kokure, otji ve rihungirira kutja kaku newe mari sewa kekwao.Tjinga okukarandisa ovinamuinyo kokure aku ve yetere ouzeu nombandjarero yotjimariva. Ongooneya ya Maheke Pijoo Nganate wa tjere nao pomapatururiro woviunda vyomarandisiro vya Eiseba pOeiseba 10 kotjiveta Oritjatano nda zu ko. “Wina matu yanisa kutja matu tjiti ouatjiri kutja katu nokutwapo oruveze rwomaworonganisiro wovinamuinyo nomarandisiro uriri nungwari wina ma rire oruveze rwouye wakandinondi rwoviungurisiwa okuura mbi novihepwa novitjoziwa vyavyo,” Nganate ma tja nao. Ya ri ondjira onde posi ya oyo ndjaave tjiwa kutja ohinopambahwa noyo ndji va tyere nokutanda kutja mave i ramanga mu kangamwa omukambo wayo nokuhinokuurwa. Komurungu wa tja orukondwa rwa Maheke ombura ndja zu ko rwa kara nozovandisa nozoparamita 204 naru randisa ovinamuinyo mbi ri kombanda yo-94,036, mu vyo 70185 ozongombe nozonyanda 23,851, avihe kumwe vyonḓengu yOzondora za Namibia omangete 257.  “Otjiihamise kutja ngunda atu pitisa ozongombe zetu mehi nomuinyo nu matu hepa okurundurura ongaro ndji okuhara oviungura, okunyomona omekurisiro wokozombanda nomatjoziro wonḓengu koviungurwa vyetu,” Nganate ma tja nao. Na ryama komurungu kutja pe nomivero omipaturuke omihandjauke vyomayandjero woviungura nomaweziro wonḓengu kovinamuinyo tjimuna omaunguriro womikova, ozombandi nozondao pozonya posi ya ihi kamaatji tjitwa ngunda ozongombe aze pitisiwa mehi nomuinyo, omikova nozonya zayo. 

“Tji twa zepere ozongombe zetu mehi matu yenene okurandisa ovize vyoponyama kovandu vetu ombiriha nu tjiva avi yandjewa otjari koviwaṋa ovihepauke nu ndino ndi ondjara ai ha rire orupa na eṱe nu ongaro ai vatere orukondwa rwetu okurikareka ko nomuinyo.