Kae Maṱunḓu-Tjiparuro
Ondumbirombi yovanatje ndji mai yende amai honapara nandarire mokati koviwaṋa vyOvambanderu nOvaherero mbi ha tjiukirwa ku yo.
Oyo iimwe yozongendo momahungi wovahungire pekepeke mu vo mu mwa ri ozombara zOvambanderu nOvaherero mOkeseta omayuva womasuviro nga zu ko. Oro nda hitasana nongendo yarwe ndja raisirwe i yOmbara Otjitambi Nguvauva, Ombara Otjitambi Hoze Riruako nOmbara Turimuro Hoveka, ndi ri ehupo roviwaṋa vyazo ovyo nai mbi nomatokero omanene wondjara nandarire ndja uta okuzepa ovandu moviwaṋa vyavo tjinene ovanatje.
Omatumbiro nomatjindiro omavi wovanatje nai ya utu okumunika mOvambanderu nOvaherero, Ombara Otjitambi Nguvauva ma tja novanatje morupanda. Tjinga nambano omauzeu tjimuna nga moviwaṋa vyeraka rOtjiherero aya vaza. Owo wina nge tjitwa i yozongaro mozonganda zOvambanderu nOvaherero nḓa rundurukira kouvi nu tjinene mokati kozoserekaze.
Ma tja ngahino okehi yozombameno ozoserekaze nḓu ze na zo nehupo nda rira engundi otja tji mape heewa motjiwaṋa nandarire moviwaṋa vyOvambanderu nOvaherero. Tji matji hepa otjiwaṋa okuripura kutja matji tjiti vi okurikareka nomuinyo nokutja ongaro ndja ri mokati katjo ngahino i kotoke.
Katjisupi motungovi mwa ri amwa handjauka onḓengura yokanatje kozombura ine ku ka ri novito kaaku zu ka tonenwe i youkwao mEpukiro. Tje ri otjiṋa tji tja vazere korupa rOnḓikasaneno nOmbwiro yOvanatje.
“Mbara Otjitambi hi nokuvanga kutja tu kare pOkeseta, vandu vetu atu kara pomayamberero ngunda otjiwaṋa tjetu amatji ṱondjara,” Ombara Hoveka ma tja nao. Na raisa kutja orukondwa rwa Maheke ru tjiukirwa kutja mu nOvambanderu nOvaherero mbe tjiwa okuṱuna otjiwaṋa ngandu kovanatje. “Orukondwa ndwi nambano mozondondo nḓo rwa utu okusana kwarwe. Eṋi ndi ri ko, ndi mari huwa ra rire evi nomasa,” Hoveka ma tja nao. Na weza ko kutja orukondwa ndwo karu naa rwa rorere okutjindira kwarwe mena rourumbu posi ya nai rwa vaza pondondo ndjo. Tjarwe momihoko kamu naa mwa ṱire ovanatje i yondjara. Posi ya tja utu okutjitwa.
Ombara Riruako ma tja otjiwaṋa tja vaza oruveze oruzeu mehupo na wina nai tje ekukara nomatokero mongarero yatjo otjomuhoko. Tji matji hepa kutja u haame pamwe u ripurire kondjira komurungu.