Kae Maṱunḓu-Tjiparuro

Orata yOkarukondwa kOmatoororero ka Mongua, PK Kazongominja, ma kwambere ko ozorata zovirata vyotukondwa nozongomainde okuungura kumwe na pamwe novaungure vyovirata mbi. Kazongominja nai ongu ri Omuhamise wOvihavero vyOkomiti Ongarerere yOmambo nOviuṋe vyOmbwiko yOtjirata tjOtjiwaṋa. Oyo nai ndji mai ryanga mehi okutara momambo wovirata okukongorera ondunge ndji ve yandja ku vyo kutja omananeno wavyo tjinene ohunga nomambo wavyo ye kengame. Kazongominja Omandaha wa hungirire ku nombako ndji Keetute yOmurari wOndjivisiro Ombaranga ohunga norukosi rwavyo ndwi. Ma tja pe novirata vyombazu mbya heruka korutenda mu vyo mu mu notjirata tja Kakarara owo nai mu vyarwe ovingi mu ve ri mondambo noruuma rwaavyo naṋi mave vi petere mondjira na momirari mbi ri vyo tji kwe ya komananeno nomaṱiziro womambo wavyo wotjimariva. Tjimwe tjotjirata tji tja ri atja heruka korutenda tja ri ihi otja Eenhana nu kombunda yokuhaama pu na tjo nai matji munika okukotoka kombanda yorutenda. Ama tja tjinene ombutarero yatjo ya ri ozorata zatjo okuhinokutjiwa ovaungure vatjo kutja ve ungura tjike nokuhina okuvetarera popezu kutja oviungura vyavo ve ungura poo ve ungura ousopoke poo indee. Kazongominja ama tja potuingi ovaungure otjozonongo moviungura vyavo kombanda yozorata ozo nḓe hi nondjiviro poo ounongo woviungura vyovirata tjinga aze ri ovandu vakauriri, otji ze raerwa i yovaungure kutja oviungura vi kayenda nangwari ape he ri nao. Mu nao otji ma munu kutja kazorata porwe nḓe kongorera nokutarera ovaungure popezu nungwari mape vatere tjinene oviṱo aviyevari imbi tji vya ungura pamwe na kumwe.