KATIMA MULILO – Muñoli wakatengo kamakwambuyu George Simataa nakalimezi babeleki bamuuso babatepelela mwamisebezi yabona, kono nalumbile maofesi amañwi amuuso kakueza hande. Nalumbile sihulu likolo la makete ni likolo la mabasi kakusebeza hande ni sicaba, kono naize buñata bwa makolo amuuso ni liofesi zeñwi zamuuso basatepelela mwakusebeleza sicaba. Nabulezi zeo Labune, kwamafelo amazazi amane akutabela lizazi la babeleki bamuuso mwa Afrika kone kubile teñi mwa Katima Mulilo.

Lizazi neli tabezwi mwatasa mutomo otwi ‘Kufundota kwa Mahala mwa Afrika Kutokwa Kamaiso ya Sicaba yeitukiselize Kusebeza Katata.’ Naize nihaike naha Namibia ne amuhezi Mulao Ozamaisa Sicaba ni litaelo zateñi zelobañwi, obata kumbweshafaza lisebelezo zasicaba, buñata bwa maofesi amuuso halateleli mulao wo. “Lubona milao yemiñata yezamaisa maofesi amuuso ipahekilwe famamota. Kono hailatelelwi. Luswanela kulatelela milao yeo. Luswanela kufa likalabo kwasicaba kabunako. Haiba hamuna kalabo muna nikufa kalabo kuli muamuhezi kupo yeo, mi mukasebeza kuyona,” nekubulezi Simataa.

Babeleki bamuuso bazamaiswa kimilao yasicaba yefumaneha mwa mutomopuso ozamaisa babeleki bamuuso one uamuhezwi mwasilimo sa 1997. Mwamanzwi ahae ane abalezwi kimubakweli walikwambuyu walikolo la lipisinisi Verna Sinimbo, Ngambela wanaha Saara Kuugongelwa-Amadhila naize mulao ozamaisa babeleki bamuuso mwa Afrika kiwabutokwa mwakutahisa zwelopili. “Kutokwahala ciseho nikusebeza katata kwababeleki bamuuso mwalinaha zewela mwa Afrika kuli milelo kaufela yelelilwe yalitaba zakufundota mahala ikone kupetahala, kuli luhulise litaba zasifumu ni lipisinisi mwa Afrika,” nabulezi.

Naize kikwabutokwa kulumba maofesi aeza hande , sihulu babeleki bamakete bane basebelize katata mwanako yakulwanisa butuku bwa Covid-19. Kacwalo ofesi yezamaisa maofesi amuuso nefile mipuzo lapilli kwamaofesi ane aezize hande. Ofesi yebona zakutatuba lipiho (Auditor General’s Office) ni katengo kasikiliti sa Erongo nebafilwe mupuzo wapili kakusebeleza hande sicaba. Kacwalo Kuugongelwa-Amadhila nasusuelize babeleki kaufela bamuuso kusebeza katata.