Bayahi batolopo ya Katima Mulilo banze baya kabuñata kwasintolo sesi lekisa litapi sa Namibia Fish Consumption Promotion Trust kuyo leka, sina bundui habukwalilwe kanako yacwale.
New Era hane ipotezi sintolo Lamubulo viki yefelile, baleki nebali fande yasintolo bafilikani, kasamulaho akuyema nako yetelele mwamibamba kasepo yakubata kuleka litapi.
“Nise niyemi lihola zepeli, kono hakuna yakena kapa kuzwa. Halusika tela likoloti lutile kutoleka. Kono balubulelela kuli lulibelele. Luka libelela nako yekuma kai? Haiba kale bapalelwa babulele. Baswanela kubata sibaka sesituna,” nekubilaezi muleki yana filikani Gift Masiye.
Muleki yomuñwi Priscah Makabi naekelize kuli seli mukwa wakamita kuli batu bana nikulibelela lihola zeñata kuleka litapi, nikuli sintolo silyehanga kukwalula.
“Seli mukwa wakamita; batu bafitile kwanu ka08h00 halubulela seli 13h00, kono hakuna ze ezahala. Luna nize`nwi zakueza; halukoni kuyema fa lihola zetalu kuisa kuzene, lulibelezi kuleka litapi. Baswanela kueza sesiñwi,” nakupile. “Cwana kumaswe! Haiba babeleki kibabanyinyani, bakenye batu misebezi. Isi kuli mutu yaswana kiyena yalongola, kubakanya ni beya fasikala. Kikusinya nako. Baswanela kutisa ni litapi zeñata,” neku ekelize muleki yomuñwi Chibikubantu Yalubbi.
Hana kupilwe kualabela falitaba zeo sibuabui wakampani ya NFCPT De Wet Siluka naitumelezi kuli sintolo hasikwanisi kualabela kwatokwahalo yasicaba, mi naize iekelize bakeñisa kukwalwa kwabundui, kacwalo limbambakayawe sihulu ma 10kg alekiwa hahulu.
“Nako feela sintolo silyeha kukwalula kiha basweli kubakanya litapi. Hape babeleki kibabanyinyani kakuli bababeli bainzi mwapumulo, ofesi ibelekisa batusi,” nekubulezi Siluka. Natolokile hape kuli “butata bobuñwi kibwa kuli muyaho olusebelisa kiomunyinyani. Kono taba yeo ika tatululwa kakuli la 1 Yowa, luka tutela kwasintolo sesinca. Kacwalo lukupa baleki baluna kulu hauhela halunze lutatulula butata.” Nabulezi hape kuli balekile libatisezo leliñwi kuli bano buluka litapi zeñata.
“Haluka tutela kwasintolo sesinca, lukakona kubuluka litapi zelikana 48 tonnes. Baluswalele feela hainyani,” nekukupile Siluka.