Marythar Kambinda

KATIMA MULILO - Mubakweli Ngambela Netumbo Nandi-Ndaitwah uelelize naha kuambuka mikwa yesebelisa sizo kutisa mifilifili. “Litumelo zaluna za sizo, mikwa ni lika zelueza liswanela kuba susumo yeluisa kwasicaba sesi tiile sesi ikuhumuseza naha Namibia,” nabulezi mwa manzwi ane abalezwi kanako yakutabela mukiti wa Batshara, Lasunda viki yefelile kwa Sangwali mwasilalanda sa Judea Lyabboloma. “Haiba lubata kuli naha yaluna ni sicaba sayona sifite fokulumbile, luswanela kubona kuli halulwanisi swalisano kuli kukone kutaha zwelopili.”

Nabulezi hape kuli mikwa yeminde yasizo kiya butokwa mwakutisa zwelopili. “Sihulu taba yakubukeleza silalanda, teñi mwalilimo zefelile mikwa ni likezo za sizo lifitezi kwapili kubukeleza silalanda,” nekubulezi Ndandi-Ndaitwah. Undiwanyangela nebailo kubukana kwa Sangwali, muleneñi wa Mulena Boniface Shufu kuyotabela mukiti wa Batshara. Mukiti one usika ezahala kuzwa silimo sa 2019 bakeñisa butuku bwa Covid-19, notabezwi hala mutomo otwi “Kubabaza Sizo kutisa Zwelopili ni Swalisano.” Mukiti ulela kutabela sizo sa Mayeyi kalico ni Kubina.

Mwa manzwi ahae mulena wa Mayeyi nasupile kuli mukiti hauleli kubabaza mutu kapa lusika, kono kiwamushobo wa Mayeyi kaufela - kuzwa lilimo zabutanga, buhateleli ni bukoba kuisa nako yatukuluho yanaha mane kutisa cwale. Nabulezi hape kuli mukiti uba kolo yakuziba kobawela, “”kakuli ulu susueza kuambola ni babahulu mwa sicaba kuikabela makande ni zibo kuamana ni swalisano mwahala mabasi ni kukuteka babahulu.” 

Baeteleli babañwi kungelela cwalo ni likwambuyu wazwelopili yalibaka zalitolopo ni matakanyani, ni mubusisi wasikiliti sa Zambezi Lawrence Sampofu, bayemeli basikiliti ni katengo katolopo hamohocwalo ni baeteleli basizo kuzwelela mwasikiliti, hamoho cwalo ni naha Botswana nibona nebaliteñi kwamukiti.