Marythar Kambinda

KATIMA MULILO – Musika wasicaba waKatima Mulilo one ukile wakwaliwa la 16 Sikulu, kasamulaho balekisi babañwi baswalelwa kakokwani kaCovid-19, nokwaluzwi viki yefelile kulatelela kukeniswa kamilyani. Muzamasi wakatengo katolopo Raphael Liswaniso nihakulicwalo naelelize balekisi kuli buñata bayambuzi kakokwani. Kacwalo baswanela kunga mihato yasilelezo, nikuisileleza mi kakueza cwalo baka sileleza mabasi abona. “Batu basweli kushwa. Ye kona taba yaniti, mi muziba cwalo. Kacwalo lusike lwaicanganisa hala butuku bwaCovid-19. Kuna nibabana ni milyani yakufaela mwamazoho, ni babasabilaeli kana yomuñwi ukatimela. 

Musike mwahupula kuli libaka hane lukwalile musika neli kuli nelusalati kuli mulekise, kono neli kulatelela milao yezamaisa butuku bwaCovid-19,” nekubulezi Liswaniso. Muyemeli watolopo Lister Shamalaza nabulezi manzwi aswana, mi nakupile balekisi kuba ni milyani yakufaela mwamazoho. Nafile mamela hape kuli babasike kufumanwa ni milyani yakufaela mwamazoho ni mamasiki, habana kulumelelwa kulekisa. “Kaufela mina muswanela kuba ni mamasiki, nikuzwelapili kuba mambala. Kakokwani kasaliteñi mwahala luna, mi kabulaya. Kacwalo, kubao babasalumeli kuli kateñi, kuzwa kacenu, lulakaza kuli mucince maikuto amina, ni kukala kulatelela mihato yasilelezo,” neku ekelize muyemeli.

Watson Kalaluka ili muyemeli kwatengo katolopo, kwalineku lahae nabulelezi balekisi kuli katengo kautwisisa sililo sabona kakuli kuna nibabaitinga fakulekisa mwamusika kufepa mabasi abona. “Kikaliba leo hane lusebelize katata kubona kuli musika wakwalulwa. Lwamikupa hape kuli mukuteke bakanteli kakuli bateñi kuobna kuli milao yalatelelwa. Babana ni lisupo muye muyo itatubisa, isiñi kutaha kwamusika. Mulekisi kaufela ya akaleza muhabo kuli una ni kakokwani kono uzwelapili kulekisa, uswanela kubiha mutu yacwalo, ili kuli lusike luto kwala musika kakokwani hakaka yambukela kwabalekisi babañwi.