RUNDU- vaporosi ruha romakona kono zoKavango zoupumezuva kuna kupapara kambunga kovalingilingi kavakere nomauta ava kavaveke kumwe nokuroya mukungi positasi somaholi vana kutumbura asi Engen sakara mositaura sa Eugen Kakukuru, omu valingilingi ava kavaveke yimaliwa yokusika ko N$386 000 kumwe nokuduka. Yimaliwa eyi kayikere asi monzira zokukayitura kombanga nye valingilingi ava omu kava gwene mbudi asi yiyo yina kuhoroka eyi, kapi todiva nye ntudi vahepa kukara asi kuna gwana nombudi kovantu ava ava rugana pevango olyo.
Vawidi ava kavazire pevango nomauta nopisitora, makura kumwe nokulika ogu kakere noyimaliwa, nokuroya mukungi mokuguru, kuzonagura makoso gehauto olyo kalikere ngano lidamune simaliwa oso, awo kumwe nye nokusika ehauto lyawo vatunde pevango lina, ogu kayinkondopekere, komisara gona govaporosi Bonifatius Kanyetu, ogu ana kara asi yige mukwatakanesi ruha romakonakono moKavango zoupumezuva. Mokukwama mwendi age Kanyetu, katente asi ehauto eli vana ruganesa kuna kara lyosilva Toyota Corolla. “kwato simpe eyi vana gwanako, ntani kwato simpe ogu vanayikwatere. Ose simpe kuna kutwikira nomakonakono getu, yimo ngoso ana kutanta kumwe nokuyinkondopeka asi N$386 000 yiyo yimaliwa kavaveke mosihorokwa esi.
Gonomvhura 39 mukungu ogu kavaroyere mokuguru murugani gokampani za TanhweSecurity force. Kehagero tupu lyokwedi kwa Sikukutu ngesefa zangesi kwamwene hena simponga sokulifana omu vawidi ava vahomokerere evango eli kumwe nomauta gawo vaveke yimaliwa yokusika koN$40 00 noruveze oru kapi vavagwana. Vagara kwawizire mositora siruwo oso yialiwa kwakuhara kuyitwara oku ava yipungura. Vnangesefa vahepa kuruganesa mafano vana kutumbura asi CCTV eyi nayituvatera tukwate valingilingi ava, ntani awo vahepa kuruganesa kampani zovasecurity vatware yimaliwa eyi kombanga, kapisi varugani vawo, morwa varugani nawo ngoso moudigu vana kuvatura. Yimo ana kutanta Kanyetu.
“ Ngesefa ndi vantu wokulikarera vahepa kusesupika kugenda noyimaliwa yina huru opo-awo vahepa kupura mbatero nsene asi kuna kara noyimaliwa yokuhura opo, nye kapisi pwavene, yimaliwa kapisi ureru kuyigwana nye awo kuna kurerupika kovatjotji vayigwane noureru. Awo kuna kuyitura vene poruzera yipo vayivavake vawidi. Yimo ana kuyagwedako ngoso nokuhageka.
- jmunyamba@nepc.com.na