Omupopiliko wehangano lokuyandja ohonde loNAMBTS Titus Shivute okwa hokolola ta ti ehangano lavo ola taalela eshongo linene eshi paife ovanhu tava ende kashona okuyandja ohonde.
Okwa ti ovanhu otava pula ehangano opo li kale tali va futu ngeenge tava yandje ohonde yavo shaashi vati ove udite kutya kashi li mondjila okuyandja ohonde yavo oshali.
Shivute okwa ti naashi osha eta opo komandiki okuyandjela ohonde ku kale paife iha ku holoka vali ovanhu vahapu shaashi ovanhu ina va hala vali okuyandja ohonde osha li. Eshi a ninga eenghundafana naKundana Etitano Shivute okwa hokolola Etivali ehangano lavo kwa li ola dimbuluka efiku lokuyandja ohonde mounyuni eshi ovanailonga kwa li ve li yanena moitukulwa ya yooloka tava pula oshiwana shi yandje ohonde.
Okwa ti ovanhu ashike 200 va yandja ohonde moshilongo ashishe mefiku olo. Onghee eshi otashi u like efano lii shaashi ovanhu kave na vali ohokwe yokuyandja ohonde ngaashi kwa li shito nale.
“Otwa ninga eenghendabala dokuninga oikonga meefikola noshoyo komandiki omangeshefelo a tu yandje ouyelele kombinga yefimano lokuyandja ohonde ashike ovanhu otava twikile noku holoka mwaalu mushona,” Shivute ta ti.
Shivute okwa yelifa ti ehangano lavo ita li dulu okufuta ovanhu oshimaliwa shaashi iha li mono oshimaliwa shomutengenekwafaneko kepangelo shokukala tashi futu ovanhu.
Okwa ti okuyandja ohonde ota ku di ehalo lomunhu yemwene ndele ihava kondjifa omunhu va yandje ohonde.
“Ohonde oya fimana shaashi iha i kwafele ovanhu vahapu ve li momhumbwe yohonde moipangelo ve na omikifi da yooloka noshoyo oomeme ngeenge tava pulumuna ile omunhu ngeenge ta tandwa,” Shivute ta ti.
Onghee okwa kunghilila oshiwana opo shi twikile nokukayandja ohonde opo moipangelo mu kale mu na ohonde ya wana okukwafela ovanaudu. Okwa weda po ta ti oshiwana nashi twikile okutopolelafana ouyelele kombinga yefimano lohonde opo ovanhu va kale va xwaxwamekwa okukala ve na ohokwe.