Omulumenhu weedula 39 okwa holoka momhangulilo yaMangestalata mEenhana, eshi vati a denga ina noikulumbwati fiyo omefyo, ta xwike omudimba waye, nokonima okwa tanaukila po okatekula kaye keedula hetatu ndele nako te ka denge noku ka monifa oshiponga.
Otaku hokololwa kutya konima yokudipaa ina, Eino Ndulyatele okwa xwika po yoo vali onduda yamumwainakadona omo taku kokololwa kutya omwa pila omaliko ayeshe.
Oshiningwanima osha ningwa meumbo lavo momukunda Elombe moshitukulwa shaHangwena Osoondaxa efimbo longula lwopotundi 07h00.
Nakufya okwa tongololwa oye Julia Ndapewa Jafet weedula 61 omukalimo womomukunda Elombe.
Omupopiliko wopolifi moshitukulwa shaHangwena Sargent Andreas Nghiyolwa okwa hokolola ta ti omufekelwa okwa li ta tanguna naina nokonima yefimbo okwa kufa oshikulumbwati nokudenga ina komutwe fiyo ta xulife ponhele opo.
Opolifi oya hokolola tai ti okaana oko ka ninga oshihakanwa shokudengwa okwa li ka twalwa koshipangelo ashike paife oka lekelwa noke li monghalo i li xwepo.
Vati omushiinda shavo okwa uda meumbo tamu tanguna ovanhu pefimbo loshinigwanima nokonima eshi a ya keumbo lavo okwa hanga nale Jafet e li mekungo lohonde a xulifa, nonduda yoipeleki ya tema omundilo.
Otaku hokololwa kutya meumbo omo ohamu di ounona vatatu tava tekulwa kunakufya ashike vavali inava hangika mo pefimbo loshiningwanima, omwa hangika ashike okaana kamwe oko ka dengwa.
Oshibofa osha undulilwa komafiku 14 aMaalisa opo ku yandjwe omhito komakonakono opolifi.
fhamalwa@nepc.com.na