Walvis sBay – Ndango zodorpa zaWalvisBay kazigeve marondoro kovatungimo asi vaharanda ndi asi vafute simaliwa nkenye selitjangeso kevhu eli lyononomora 37 eli lyakara ponze zodoropa zina zekezenga. 

Eyi kuna kwama poopo ndango kazigwene mbudi asi vantu wopaumwene kuna kuvaka ava vana hara evhu yiyonye vana kutanta asi awo kuna karerepo ndango zodoropa mokutjangesa vantu vafute yimaliwa yelitjangeso makura awo vakagwane evhu. 

Ewapukururo lyofarama ezi 37 simpe kapi linatameke, awo kunapumbwa yimaliwa yokusika ko N$250 miliyuna vawapukurure evhu eli. Muhuyungilipo ndango Caty Sheya katente asi awo kuna gwanekere novantu vana kusivana asi koveli vana kuvapura ndi vana kurandesa mavango gokutunga omu vana kulikumbagera asi awo varugani wondango zodoropa. Yimaliwa eyi kuna kara asi yokukuwapayikira nye ogwane evhu lyanyamoge. 

Ano ndango ngesi kuna kugava mapukururo asi vantu vetu vahafamo melikwamo lyangesi. Ngendeseso zokurandesa evhu kuna kara tupu asi kukwama nongendeseso edi vaturapo nare dopaveta, nomapukururo gamawa. Nokugwedako asi mapukururo vana kugava vahana kupitira mondango vahepa kugatarurura momunene ntani vagahuguvara. 

Twahepa kuhageka eyi yokugava silinga pamundinda yimaliwa kuyifuta moaccount, ntani wahepa kutara asi account musinke ozo, nokuhundira asi nepu ono yimono zende kovaporosi kosasiyona zina kara pepi. 

Farm 37 kwazitere nare mo 2016 vakansela vanare nanguuru gomukunda gwanare Cleophas Mutjavikua omu vayimwene asi kuvhura kukagusapo udigu wevhu mokutunga mambo. Evango nye eli kuna kumoneka asi kuvhura vakagwanepo mavango gokudika mambo gokusika ko 30 000. Nye nampili ngoso elikwamo lyangesi kupura unene simaliwa. Mukurona godoropa zaBaye, Trevino Forbes kwatente mwaJanuary asi farm 37 kuna kara simwe selikwamo lyawo mvhura ezi, morwa doropa kuna kukura novantu kuna kuvhuka, makura udigu wouturo ndi asi mambo kuna kara udigu wounene vana kumona ngesi. 

– edeklrk@nepc.com.na