VaNamibia ava vatunga nomurudi naAngola kavavadiworokesere asi vahepa kuturamo mahundiro nsene asi kuna kukadingura ntani pwahepa kukara konda zina kutanta Yuma zina kuninkisa asi kvhura kutaguruka murudi, morwa nomurudi ngesi dina pata morwa kambumburu aka ko Covid-19.
‘’Nomurudi dina pata morwa kambumburu aka koCovid-19, nye vantu pomundinda kuvhura kutjangera mbapira kwetu omu natuvhura kupulisira muntu ogo, yimo ana kutanta muhuyungilipo Ministeli zova dinguli yirongo Margaret Kalo.
Age katente asi vantu kuvhura vagende nositambo songesefa, uhaku ndi konda nkenye ezi vana kumona asi mulyo unene. Kalo kayizeresere asi epulisiro kukwama koyo vana tura mehundiro, nokutanta asi vaAngola awo nare kuna kuvapitisira vawize mosirongo setu vayagwana uhaku.
Moomu tupu yakara nare, asi vaAngola unene ava vatunga konontera zosirongo setu kuwiza nkenye apa vayagwane uhaku nakunye koyipangero yepangero ndi yopaumwene.
Eyi yokutwaredera asi nomurudi dipate masivano kavagageve vanangesefa womoOshikango, ava vakere komeho zoCovid-19 kwakere asi awo ngavarugana ngesefa pokatji koyirongo eyi yivali Namibia naAngola.
Vanangesefa ava kavatebnte asi yirongo eyi yivali kwakara asi ngesefa zawo zimwe tupu, yipo nye asi sinzi sovanangesefa kuparukira medinguro lyovaAngola unene ava vatunga konontere domurudi.
Mukurona gwanare godoropa zaHelao Nafidi Eliaser Nghipangelwa kapandwire epangero omu lyapulisira ngesefa zitwikire ngorooro, nampili nampili ngomu yina kara asi kuturamo mahundiro.
Age katente asi mukaro gwangesi kuna kureta mapiyagano, nampili nasi nomurudi dina pata vantu simpe kuna kuruta kupitira pomavango aga vapira kupulisira.
Mukuriona gwanare godoropa katente asi nomatokoro nyeogo gakarapo asi muntu gahepa kuturamo ehundioro, vahepa kutulisapo elikwamo omu vantu navenye vayidive nokuvatantera asi vahepa kupitira pomavango ogo gakarapo gokupitira.
Age simpe katente asi mokutara nomurudi detu, kuna kara asi kapi yina kumoneka nawa unene vaporosi asi vakara tavakeverere egandaguro lyovantu momunene.
Eyi tuna kara nayo ngesi kapisi otante asi vaporosi kapi vana kurugana, awo kuna kurugana.
Nye nomurudi detu edi twaturapo kuna kuninkisa vapire kurugana nawa.
Yimo ana kutanta. Nsene asi nayinye yiwapa, hawe natukara nonomurudi edi navapitira, ntani owo nye yina tamba asi vafute mutero vahepa kurugana ngoso vakambekeko koekonomi lyosirongo.
Nghipangelwa katente asi vantu ngesi kuna kuruganesa mavango aga vapira kupulisira mokupitisa yoyiwa neyi yoyidona vamwe kuna kuruganesa nye mavango ogo varete yininke eyi vapira kupulisira mosirongo.
- nashipala@nepc.com.na