ONBOBE- Minista woyeendifo noilonga Veikko Nekundi okwa kunghilila oovene vomahangano taa longelwa koshiwana opo va fimaneke ovanailonga vavo ndele ha ku hanyaukila ovanhu. 

“Ka leni ta mu popi nawa novanailonga veni. Ina mu hanyaukila vali ovanailonga veni,” Nekundi ta ti ngaho. 

Minista edi okwe di popya Etitano pefimbo a hanga mwene wehangano ta li tungu opate mOndobe ashike okwa li ta popi novanailonga vaye teva hanyaukile. 

Nekundi pamwe naNgoloenya waHangwena Kadiva Hamutumwa okwa li va kanghameka eetuwa davo pomunghulo wopate mokumunda Ondobe opo va tale nghene opate tai ende. 

Ehangano e li ola pewa oshinakuwanifa shokulongulula opate ya ndja pOndobe fiyo Eenhana molwaaashi oi na omalambo. 

Efiku tuu olo, minista okwa li a handuka eshi a hanga omuhona ou ta hanyaukile ovanailonga vaye ta ti kutya osha puka. 

Okwe mu takela omunwe ndele temu loombwele kutya na shi ninge sha xuuninwa okukala ta hanyaukile ovanailonga vaye shaashi omunhu keshe okwa pumbwa okufimanekwa. 

“Ovanhu kave shi eembwa. Ito dulu okupopya novanhu wafa to popi neembwa. Nashi mone exulilo,” minista ta lombwele mwene wehangano ngaho. 

Nekundin okwa kunghilila omuhona ou ta ti ngeenge ota twikile okuhanyaukila ovanailonga vaye ota shuna diva koshilongo shavo. 

Mwene wehangano e li okuli omukwashiwana Omuchina. 

Nekundi okwa lombwela ovanailonga opo va kale tava lopotele ngoloneya wavo ngeenge tava kolonyekwa kovahona vavo. 

“Ka leni mushi oufemba weni. Ina mu efa vali mu kale tamu londofokwa mwafa eembwa,” ta ti. 

Okwa kumaida ovanailonga opo va twikile okulonga nelitulemo. 

Mwene wehangano e li Qindao Moi, okwa lombwela minista ta ti ota lundulula nokukala a popya novanailonga vaye pamukalo muwa. 

Okwa ti elongelokumwe olo ashike la fimana shaashi opena ovanailonga vamwe have ya koilonga va lata. 

Nekundi okwa nyamukula ta ti omunhu te ya koilonga a lata ile ite li ufa komilandu na pewe elondwelo lopambapila. 

Efiku tuu olo, Nekundi okwa pula ovanailonga kutya ohava futwa ingapi osho yo ngeenge ova pewa omikunda deudafanotwokumwe moilonga. 

Okwa lombwela omuhona ta ti ngeenge ope na omunhu i na pewa omukanda ou, opo a kale a pewa diva omukanda weudafanotwokumwe woilonga shaashi owa fimana. 

fhamalwa@nepc.com.na