Eshi oidjemo yondodo onhi-11 tai piti mo mEtitano loshivike eshi, omukunhuwiliki wehongo mouministeli wehongo Sanet Steenkamp okwa kunghulila ovadali opo vaha tangunine ounona vavo ava inave shi endifa nawa neudo moidjemo yavo.
Steenkamp okwa ti ovadali inava ula ounona omalaka mai shaashi eshi otashi piyaneke omadilaadilo okaana eshi keli nale monghalo idjuu yoidjemo yavo ina i enda nawa.
Okwa kwa ti ovadali nave shi tambule ko kutya okudopa kaku shi exulilo lounyuni, yee ta ti ngeenge okaana ka dopa itashi ti kutya okaana okalai ndele oka nyengwa ashike.
Edi oda popiwa komulunhuwiliki wehongo eshi a ninga eenghundafana naKundana Etitano, a hokolola ta ti ngeenge oidjemo yondodo onhi-11, ile ondodo onhi-12 tai piti ohashi kala shidjuu kovanafikola okutambula ko oidjemo yavo eshi vahapu hava kala tave lipula kombinga yonghalamwenyo ile ve na oumbada kutya ngeenge ova dopa otava tanguninwa ile va tewe mo momaumbo kovakulunhu vavo.
“Ovadali nava ulike oukwaowananghali kounona va dopa, vo nava kale ve na ombili nounona ngaashi naana va kala shito. Okaana ngeenge oka dopa, omudali na yandje omayele kokaana kutya oshike tashi ningwa po opo okaana ka ka lundulule oilongwa yako ile ka ye koiputudilo yopaungomba,” Steenkamp ta ti.
Okwa hokolola ta ti oidjemo ngeenge tai piti ohashi eta oinima ii ngaashi ovanafikola vamwe ohava kwatwa komhepo yokulikufa eemwenyo eshi va kwatwa kehandu ledopo.
“Ovanafikola vamwe ohava kala tave lipula kutya ngeenge ova dopa kape na ou te va kwafele vali, naashi ohashi kala oupyakadi wa kula kounona,” Steenkamp ta ti.
Okwa kunghulila ovanafikola ta ti eshi kasha shi exulilo lounyuni onghee ovanafikola nava kale ve na omukumo opo ve ke lishangife komandiki opo va wapaleke oilongwa yavo neudo.
“Ovanafikola va dopa inava teka omukumo, inamu kwatwa komhepo yokulonga oilonga yoimbuluma ashike kaleni mu na ombili nondjungu yokulitula mo neudo eshi tamu ka endulula oilongwa yeni,” Steenkamp ta ti.