Ngoloneya gwoshitopolwa shaMusati Erginus Endjala okwa yeleke shoka tashi taambathanwa komalungula kutya okwa ti ota thigi po oshipundi shuungoloneya, ta ti hasho a ti ngaaka.
Olyomakaya sho kwa ningwa ohungi yokugongela oshimaliwa shokuyambidhidha oshituthi shOlufuko kOutapi, ngoloneya okwa popi kutya, otashi vulika shi kale esiku lye lyahugunina okupopitha oshigwana, oshoka ethimbo lye ndyoka a li a pewa okulonga olyi li okuya pehulilo.
“Inandi tya otandi yi, ihe onda popi kutya otashi vulika shi kale esiku lyandje lyahugunina okuthikama komeho goshigwana oshoka esiku ndyoka nda pewa okukala miilonga olyi li pokuthika ,momasiku 20 gaJuni nuumvo,” ta fatula ngaaka.
Endjala okwa ti, oshigwana nashi kale hashi pulakene nawa, kaashi taambathane nokwaandjaneka uuyelele wa puka.
Uule woomvula dha za ko, olufuko olwa kala nokutalika neho lyopambambo ongomukalo gokufala aanona aashona mondjokana, ashike oshili osho shoka kutya olufuko elongekidho ashike lyokanona okakadhona oku ka longekidhila onakuyiwa yuukuluntu.
Oshituthi shika shopamuthigululakalo shoka hashi holoka omumvo kehe mOutapi moshitopolwa shaMusati, ohashi kutha aakadhona yaNakatyepa okuza komalelo gatano ga yooloka gopamuthigululwakalo gomoshitopolwa shoka.
Sha ikwatelela koonamunganga, olufuko oshitopolwa oshinene shopamuthigululwakalo shoka hashi longo okanona okakadhona nkene ke na okukaleka po omuthigululwakalo gwOshiwambo.
Omauliko ngaka uule woomvula dha za ko oga kala nokulongekidha aanona aakadhona okuza poomvula 14 nkene ye na okutsa omahangu, okudhunga omalovu giilya, okwoonga oombiga osho wo yilwe ya simana ngaashi nkene omukiintu e na okwiihumbata pokati kaantu nosho tuu.
“Ngele okakadhona oka ningi etegelelo inaaka ya kolufuko, nena osha talika ko kutya oshidhila na osha simana opo aakadhona ya ende mondjila ndjika yolufuko. Ohatu longo aakadhona nkene ye na okulela uunona uushona osho wo esimano lyokusimaneka ondjokana,” osho Namunganga ya ti ngaaka.
Okwa fatulula wo kutya aanona mbaka haya yi kolufuko kaye na oohonda nangele ope na ngoka e na omalongekidho gokuninga ohango nena ota vulu okuya kolufuko ye ta ka tsikila oku ka hokanwa.
vkaapanda@nepc.com.na