Auleria Wakudumo

Oshakati – Elelo lodoolopa yaShakati ola pitifa omutengenekwamwaalu woshimaliwa womudo 2025/26. Elelo ola tengeneka momutengenekwamwaalu walo kutya otali ka longifa eemiliona N$87.2 okutunga nokuyambula po omalukanda mOshakati. 

Mayola wodoolopa yaShakati, Leonard Hango okwa shiivifa ngaho pefimbo elelo lodoolopa tali pitifa omutengenekwamwaalu woshimaliwa womudo 2025/26 weemiliona N$350, Etitano mOshakati. 

“Ohatu ka wedela ko olukanda lipe, tali ka ifanwa Oshakati North Extension 1 keemiliona N$56.7. Olukanda otali ka kala ovakwashiwana okudja komalukanda a yooloka oo ta aka hanaunwa po,” Hango ta ti. 

Okwa weda po ta ti omalukanda amwe, unene oo ehe na omayakulo elelo lodoolopa yaShakati e lixwa po, otaa ka hanaunwa po novakwashiwana otava ka pewa omalukalwa aalushe kolukanda lipe. 

Elelo lodoolopa yaShakati ola holola yoo kutya otali ka longifa oshimaliwa shi fike peemiliona N$8.5 okutula ominino dokudinda omeva ma kaka koshi yedu. 

Eshi otashi ka kwatela mo okutunga koshi yedu nokutula ominino medu, okukwatakaneka ominino nadikwao opo di fike nokudida omeva oo. 

Natango, elelo lodoolopa yaShakati otali ka longifa oshimaliwa shi fike peemiliona N$8.5 okutunga otenga yomeva yokoshi yedu osho yo yopombada kolukanda Evululuko. 

“Ohatu ka longifa eemiliona N$7 okutunga okanala kokunana onyata kEvululuko,” Hango ta ti. 

Hango okwa twikila ta ti elelo lodoolopa yaShakati otali ka tula yoo moilonga lokutula ominino domeva medu opo va kwashilipaleke kutya ovakwashiwana aveshe ove na omeva a yela. 

Eshi Hango okwa ti otashi ka kosha ongushu yoshimaliwa shi fike peemiliona N$3.5.

Elelo otali ka kwashilipaleka kutya ola tunga okanala konyata osho yo okutula omeva molukanda Okandjengedi North osho yo Okandjengedi South. 

Hango okwa holola kutya ova pewa eemiliona N$103 kouministeli womayambulepo omikunda needoolopa okukwafela okuwanifa po imwe yomeemhumbwe dodoolopa ngaashi okuyambula po omalukanda. 

“Eeproyeka adishe da tumbulwa metetekelo otadi ka tulwa moilonga molwekwafo olo twa pewa kouministeli womayambulepo omikunda nedoolopa,” Hango ta ti. 

Nonade elelo la mona ekwafo lopashimaliwa okudja kouministeli, mayola okwa indila ovakwashiwana va twikile nokufendela oifendela yavo yomeva ile olusheno opo va twikile okuyambula po odoolopa. 

“Ohatu indile ovakalimo novanangeshefa vaShakati va kale hava futu oifendela yavo pefimbo opo tu dule okukala hatu yandje omayakulo a wana po kovakalimo aveshe pefimbo,” Hango ta ti. 

-wakudumoauleria@gmail.com